Katekesis no.100

Pag-antos Pinasikad: Lk. 9;22-25

Pagpamalandong sa Malangkubong kaayohan

Lisud dawaton nga ang Mesiyas ingon nga pangulo ang kinahanglang mag-antos. Gipasidan-an nang daan ni Jesus ang iyang mga tinun-an nga ang anak sa tawo mag-antos ug isalikway.

Kining maong pasidaan usa ka dakong eskandalo alang kanila nga nagtuo kaniya. Lisud dawaton kining maong pagtulon-an.

Apan kini mao man ang tatak kun timaan sa atong pagkasumusunod ni Kristo Jesus.

Nganong mag-antos man gyud ang tawo? Dunay mga hinungdan.

1.   Mahimong mag-antos siya kay iyang tinuyoan.

2.  Mag-antos tungod kay gipaantos man sa uban.

3.  Nag-antos tungod sa balatian.

4.  Nag-antos tungod kay giisip man kini nga kahimanan aron mapitol ang wala sa lugar nga tawhanong kahilig.

Daghan nang mga kwaresma ang nangagi sa atong kinabuhi apan sa gihapon daghan  nato ang wala makasulod sa tinud-anay nga diwa niini.

Ngano man? Tungod kay ang anaa sa atong hunahuna mao man ang panggawas nga mga kalihukan.

Nag-antos kita gumikan sa atong sala. Ug kun ugaling mahanaw ang sentido sa sala kita sa gihapon mag-antos apan pag-antos nga dili makahingpit ug makalimpiyo. Pag-antos nga magdala kanato ngadto sa kalaglagan.