EDITORYAL - Child pornography

Walay hunong ang mga otoridad sa pagpaniid ug pagpangita aning mga tawong nalambigit sa pagabusar sa mga bata nga gigamit sa pornograpiya, timailhan niini, kaning pagkasikop na sa ubay-ubay nga mga indibidwal sa mga operasyon sa law enforcement units inabagan sa mga hingtungdang mga ahensiya sa gobiyerno.

Niadtong nakalabay nga tuig 2017, ang United Nations miingon nga ang Pilipinas maoy dunay kinadak-ang problema sa child pornography ug online child sexual abuse.

Nag-una kining source sa maong mga malaw-ay nga videos ug live streaming og mga child sexual abuses.

Mga malaw-ay nga videos ug mga hulagway sa mga bata nga nakighilawas nga gipamaligya online . Ang tigpamalit, mga langyaw nga sex predators gikan sa Amerika ug Uropa.

Dili palang dugay, dunay usa ka 25 anyos nga babayeng gidakop sa National Bureau of Investigation-7 tungod sa pagbaligya niini sa kaugalingong duha ka mga igsuong babaye nga nag-edad og 15 ug 20 anyos.

Gamit ang cellphone nga dunay video ug may koneksyon sa internet nabuhat niya ang maong krimen.

Ang dinakpan kutob ra grade 3 sa elementarya ang nahuman ug panglabada ray nahibaw-ang panginabuhi, apan dihang nakahibalo siya bahin sa makwarta sa pornograpiya iyaha kining gibuhat.

Didto sa Amerika, dili palang dugay, ang U.S. District Court sa Tacoma mipahamtang og silot sa kanhi sundalong Amerikano og 22 ka tuig nga pagkabilanggo tungod sa iyang kalambigitan sa sexual abuse sa mga batang Pilipino sa iyang gipang prodyus nga child pornography.

Nasayran sa korte nga dugay na kining gihimo sa 40 anyos nga kanhi sundalo ug dinhi gyud niya kini gihimo sa Pilipinas. Manuhol og mga bata, posibleng apil mga ginikanan, aron maka-prodyus kini og child pornography.

Sa pipila ka mga pamilyang nag-ilaid sa kalisod sa kinabuhi karon, dunay uban nga mapugos ug maengganyo gyud sa dakong kita gikan niini.

Bahala nalang og imoral ug supak sa balaod sa pamasin nga makalusot ug makakwarta.

Kinahanglan pa gyud ang higpit nga monitoring sa mga otoridad sa mga langyaw nga manganhi sa nasud kun sila dunay mga rekord nga mga sexual predators hasta ang pagpaniid sa social media ingon man sa internet nga mao na karoy pinakadali nga paagi paghimo sa maong krimen.