Boying gustong solohon ang balaod

Sa paglingkod pa lang ni Crisipin ‘Boying’ Remulla, isip Justice secretary, nahibalo na si suspendidong BuCor Chief General Gerald Bantag nga may plano na si Boying nga sibakon siya inig ka Agosto 2022.

Busa, giunhan dayon kini ni Gen. Bantag pagsumiter og courtesy resignation. Pero wala dawata ni Boying. Unya paglabay sa mga adlaw, dihang gipatay ang hard hitting nga komentarista, Percy Lapid, sa riding-in-tandem, nakurat si Gen. Bantag nganong siyay gipasanginlan-tumbok ni Boying nga maoy mastermind?

Kahibulongan! Upat ka adlaw sa wala pa patya si Percy, puwerte niining tira-komentariyo batok ni Boying sa iyang radio program. Gipasanginlan niya si Boying nga protector kuno sa Pogo ug daghan pang gipangyawit nga below the belt na ang kasakit.

Apan naunsa ba, nga sa 160 ka pangalang gikonsiderar sa mga otoridad nga mga person of interest, si Gen. Bantag man dayoy gihukman ni Boying nga maoy mastermind?

Gisuspenso gilayon si Gen. Bantag, gipangtangtang iyang mga sinaligan ug giseguro nga walay pro-Bantag ang nahabilin aron sa pagdala-lingkod ni BuCor OIC General Gregorio Catapang, pinili ni Boying, makapatuyang silag buhatbuhat og mga pasangil nga monudnod ni Gen. Bantag sa kadaotan.

Mga piniriso maoy gipanghimong witness ni Catapang, diin bisan unsa na lang ang gibutyag nga mga kontrobersiya, diin nahilayo na sa Percy murder’s case. Labi na, nga sa unang report sa NBI, sila mipadayag nga wala gyoy link si Bantag nga mamahimong mastermind sa maong krimen.

Sanglit si Boying man ang Alas sa Department of Justice, mga abogado sa Team Bantag mipayil og motion for reconsideration nga unta Office of the Ombudsman ang mogunit sa kaso, pero gibasura sa kampo ni Boying.

Hinuon, niining bag-o, gipabalhin ni Boying ang ilang gikasong plunder batok ni Gen. Bantag ngadto sa Ombudsman kay wala kuno sa ilang hurisdiksiyon. Nganong kini ra man? Ang Percy murder’s case diay?

Hadlok ba si Boying nga masubay ang tinuoray’ng mastermind? Mao nga dili niya kini buhian aron segurado nga kon unsay iyang gusto, maoy matuman?

Pagkamakalilisang nga taras! Unsa pa man intawoy dag-anan ni Bantag ning gipakitang lihok ni Boying, diin gusto niyang solohon ang balaod nga siya mismo ang naghupot?  Grabeha, sa?