Pagsumpo sa kontrabando

Naukay ang siyudad sa Sugbo human ang bag-ong nakagawas nga piniriso sa Cebu City Jail Male Dormitory, miasoy nga adunay mga jail officer, kinsa magpabayad og P50,000 ngadto P60,000 sa mga kuwartahang inmate nga gustong makabaton og ordinaryong selpon sulod sa prisohan.

Ang makahalang sa mata, kay ang jailguard pa kunoy sugoon sa mga sapiang piniriso pagpatago sa ilang selpon kon mopahigayon og greyhound inspection ang PNP ug PDEA. Busa, wala gyoy selpon ug ubang kontrabando nga makit-an ang mga mananakop.

Apan dili nila mailad ang katawhang nagpakabana, kinsa dugay nang nasayod niini. Ug karon lang napalig-on sa mga katuohang alegasyon sa naasoy’ng piniriso. Nga jailguard personnel o officer ra diay ang tigpasulod-palusot og selpon.  Sanglit, pipila na ka drug pushers ang madakpan, kinsa motug-an nga gikan sa prisohan ilang kontak.

Bitaw! Walay makahilong tubig nga masulod sa tinakpang botelya kon dili kini ablihan ug sudlan sa naggunit. Sama sa puthawng rehas ug pultahan sa prisohan, masudlan lang kinig shabu o ubang kotrabando kon tugotan sa wardeng nagbantay.

Alang nako, sayon ra gyod unta kaayo sumpoon kining maong suliran. Dapat, sa una pa lang pagkahitabo, imbestigahan gilayon tanang warden. Ingkaso’g walay moangkon-tug-an, tanan idamay na ug silotan og makatagam. Kay ang dili pagtug-an nagpasabot nga sila tanan nagbuhat.

Ug gihimo ba kini sa head o kinalabwang opisyal sa maong ahensiya sa prisohan? Kon giimplementar man niya, nganong hangtod karon, imbes mahanaw kining pagpalusot og mga kontrabando sa sulod, migrabe man hinuon? Unya, mora pa’g salamangkero. Kay kon walay raid sa prisohan, manggawas ang selpon. Kon sulngon sa PNP ug PDEA mangahanaw!

Dili ba mosuporta kini sa giasoy sa pinirisong nakagawas, nga City Jail personnel pa kunoy tigtago sa selpon sa mga datong drugs inmates? Ug mao pay mopahibalo kanus-a tagoi? Pastilan, no? Sulod sa bilanggoan, ang jailguards gihimo rang houseboy sa kuwartahang nangabilanggo?

Unta, hatagan kinig igong pagtagad ni Presidente Bongbong Marcos. Kon mapamatud-an nga hasta ang lider ning maong ahensiya sad-an, dapat silotan unsay angay?

Kinahanglang silhigon ang tanang hugaw ug pulihan og limpiyong mga mangangalagad. Kay niini lang paagiha nga hingpit masumpo ang nagkarabeng palusot og mga kontrabando sulod sa mga prisohan.