Cellphone ug bonus

Gibulgar sa usa ka piniriso kaniadto sa Cebu City Jail nga nadakpan pagbalik nga makasulod sa City Jail ang cellphone tungod sa pagpakigkonsabo sa pipila ka jail personnel ngadto sa mga piniriso bugti sa kantidad nga P50,000 ngadto sa P60,000. Tungod niini, abli ang buhatan sa jail warden sa Cebu City Jail sa bisan unsang imbestigasyon nga pagahimoon.

Si Mayor Mike Rama naglaraw sa paghatag og P20,000 gadto sa P50,000 nga Charter day bonus sa mga regular ug casual nga kawani sa Cebu City government agi og pasalamat sa malamposong Sinulog 2023. Kini kun ugaling adunay salapi nga makaigo sa tag 50K nga bonus pero kun dili makaigo, ang mayor naneguro nga dili moubos sa P20K ang mahatag sa siyudad nga bonus ngadto sa regular ug casual nga kawani niini.

Bida sa mga balita ning semanaha ang P50k nga cellphone sa Cebu City Jail ug ang P50k nga bonus nga ihatag sa City Hall ngadto sa mga kawani niini.

Dili layo sa tinuod ang gibulgar sa piniriso nga makasulod sa City Jail ang mga cellphone tungod sa pakigkonsabo sa mga jail personnel ngadto sa mga piniriso sa kantidad nga P50k - P60k tungod kay nakasulod man gihapon ang cellphone sa City Jail bisan pa sa kahigpit sa pagbantay nga gipatuman batok niini.

Dili makiangayon nga ang mga regular ug casual lang nga kawani sa City Hall ang hatagan og P20k-P50k nga Charter Day bonus tungod sa malamposon nga Sinulog 2023 tungod kay dili man lang kining maong mga kawani ang nagwadwad sa pagtrabaho aron mahimong malamposon ang Sinulog 2023. Gani kon imo nga tutokan pagmaayo, ang mga Job Order o JO man ang miwadwad og maayo sa pagtrabaho.

Ang Sinulog nagmalamposon tungod sa panagtambayayong sa tanan busa ang tanan maoy kinahanglan nga hatagan.