Pamilya’ng mora’g  nakatag-iya  sa Basilica

Mag-unsa man ang hilabihan ka relihiyoso kong ang batasan hilabihan gyud ka bati ngadto sa isig ka tawo? Mas maayo pa ang uban nga dili hinimba kay maayo pa motagad sa mga tawo.

Daghan gyud ang maigo niini nga mga hipokritong tawo sama nalang sa usa ka pamilyahan nga nag-una og pwesto sa pilgrim center sa Basilica Minore del Sto. Niño niadtong kaadlawon sa Biyernes diin gipahigayon ang misa sa paghubo ug pag-ilis sa sapot sa Batang Hesus.

Nindot baya unta kaayo sila tan-awon kay nagkahiusa gikan sa mga apohan, mga anak ug mga apo apan nakaingon gyud ko og puwera gaba naman lang sa ilang batasan nga perting batia.

Giokupahan nila ang bleacher diin aduna silay malingkoran nga igo gyud sa mga miyembro sa ilang pamilya. Apan wala man sila makontento kay apil ang area sa atubangan lakip na ang agianan sa mga tawo giangkon naman nila. Dili sila gusto nga naay laing mga deboto nga molingkod o moagi kay lagi masalipdan ang ilang panan-aw.

Dili pa gyud igo gibutangan nila og mga botelya sa tubig aron wala gyuy mga tawo nga mopwesto. Mora’g tag iya na sila sa pilgrim center kay nag-ugbok og mga mohon sa ilang yuta pastilan.

Ang mas nakaparat kay kutob sa mga deboto nga mosulay sa paglingkod o bisan sa pag-agi ilang awayon kay kuno alas 2 pa sa kaadlawon sila nag-atang alang sa pagsugod sa misa.

Ang ubang media nga nagpwesto sa dapig kay mag-live streaming giapil pud sa pagyawyaw, mora’g mga iro nga nagpaghot og andam mopaak sa mga kaubang mga tawo nga mopwesto sa giangkon nilang space.

Ang lola ug lolo mao pa gyuy mga mangtas kaayo nga mosinghag sa mga tawo nga modason ang mga anak nga mora’g mga demonyo nga mosinghag sa mga tawo.

Wala ko kapugong busa ako silang giestoryahan nga dili maayo ang ilang gihimo nga bisan og sayo kaayo sila nipwesto o bisan 24 oras pa sila nag-atang kong ang ilang kinaiya perting batia wala gihapoy pulos ug mas maayo pa nga manguli nalang sila.

Ang ubang mga tawo nisuporta pud sa akong sermon nila nga wala nila tahora ang balay sa Dios o mismo ang Señor Sto. Niño nga maoy ilang giadto tungod kay gipasulabi nila ang ilang yawan-on nga pagbati.

Mora’g natuk-an ang pamilyahan sa akong giingon kanila nga ipatigbabaw ang kalinaw inay mangaway kay dili man sila ang nanag-iya sa simbahan.

Ok ra man unta kong pinahiluna ang ilang paghangyo sa mga tawo nga kong pwede dili sila maalihan pero pinasuko man.

Bisan unsaon pa seguro og luhodluhod sa pag-ampo kada kalihokan sa simbahan pero kon wala puy-i ang pagtulon-ang Kristohanon, wala gihapoy kapuslanan.

Ambot ba nakaingon ko basin pagsulay sila nga nisukod sa pagbati sa ubang mga deboto nga masuko usab tungod sa ilang pagkapanulay.

Bitaw kalma ug relax aron magpabilin ang kalinaw sa atong palibot kay kong tubayan sila mapun-an gyud ang atong mga sala.