Sayup nga spelling sa iyang apelyido sa birth certificate

Dear Atty. Divine,

Duna koy pangutana may labot sa akong Birth Certificate kay nasayup ang spelling sa akong apelyido. Gusto man gud ko nga mokuha og Passport kay mag-apply ko og trabaho abroad. Sa dihang mikuha ko og Birth Certificate nasayup ang spelling sa akong apelyido sukwahi sa spelling sa akong mga school records. Unsay angayan nako nga buhaton? Dili ba ko maproblema kun mopadayon ko og kuha og Passport nga di man makatugma ang spelling sa akong apelyido sa akong mga school record? Daghang salamat.

Sean

* * *

Dear Sean,

Kun spelling ra ang nasayup sa imong apelyido, mamahimo ra kana nimo nga pakurihi-an sa Local Civil Registrar diin ka marehistro. Moadto lang ka sa Civil Registrar then imong pangayu-an og listahan sa mga requirements alang sa pagpa-correction sa spelling sa imong apelyido kay clerical error ra man kana. Kun kompleto na ang imong requirements imo kining i-submit nila og i-process ang correction sa imong Birth Certificate. Mas maayo nga imong huwaton nga makurihi-an ang imong Birth Certificate una ka mokuha og Passport aron motakdo kini sa imong mga school records. I follow-up lang kanunay ang Local Civil Registrar human sa imong pagsubmit aron ila sab nga mapadali ang pagduso niini sa PSA- Manila. Thank you and God Bless.

Atty. Divine

* * *

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.