Unsay bag-o kanimo?

Gawas sa tuig nga bag-o ug sa mga bag-ong kalendaryo. Ug gawas sa bag-o nimong sapatos ug T-shirts, unsa may nabag-o kanimo personally? Mihimo ka ba’g resolution nga imo na gayud tinud-on pagpangga ang imong asawa?

By the way, ni-uso pa ba karon ang paghimo’g New Year’s resolutions? Mora’g wa na no? Wa na ni karon tungod kay ang mga New Year’s resolutions maghimo man og kausaban sa tawo mismo. Ug karon, it seems nga ang mga modernong katawhan have refused na to make amends sa nangaging kasaypanan, ug paghimo’g kausaban sa kaugalingon.

Dili sayon ang pagbiya sa sigarilyo o sa paghubog-hubog. Dili sayon ang pag-resolve nga dili na mangurakot ug dili na mo-engaged in vote-buying. Lisud ang pagpanghanti nga higugmaon ang isigka-ingon ilabina na kadtong mas nagkinahanglan, ug i-share ang katigayunan nga naangkon. Dili usab sayon ang pag-adjust sa timbangan aron makahatag sa hustong timbang sa karne o sa isda. Nga unta, mogahin kita’g mas daghang panahon, more time with the family (lisud ba gud ni?).

Busa, wala na mauso karon, ug wala na kinahanglana ang mga New Year’s Resolution, kay maka-exposed hinuon unsa ang tinuod natong pagkatawo.

Kahinumdom ko, sa nagtungha pa kami sa high school sa Saint Alphonsus Catholic School (SACS) sa kanhi Opon, ubos sa mga Benedictine Sisters (mga German nga madre), gipahimo kami og mga New Year’s resolutions.

Of course, kasagaran nag-una namong resolution mao nga dili na mo-cheat during the exams. Nga dili na magpa-late; nga dili na mosipyat pag-simba ma-Domingo; nga mangadye gayud sa morning ug evening prayers; nga mag-matinahuron kanunay ngadto sa mga ginikanan; nga dili manghilabot sa  sa sensiyo (loose coins) gikan sa bulsa sa papa; nga regular nga mo-accomplish sa mga assignments ug homework; regular nga mo-visit sa Blessed Sacrament; ug daghan pa (aron mo-bilib ang among teacher-in-charge nga madre).

Ambot pila ray akong natuman niadto (kon duna man). Apan, karon, alang sa mga dagko, dinagko na usab ang himuon nga New Year’s resolutions, dili na binata. Mao nga mas lisud tumanon. Busa, to be safe, dili na lang gayud maghimo’g resolutions, aron dili kita ma-guilty, ug dili makasukmat sa atong kaugalingon gumikan sa maong kapakyasan.

Maoy hinungdan nga karon, igo ug kutob lamang kita sa pagsaulog sa Bag-ong Tuig. Ang 2023, ug sama sa nangaging bag-ong tuig, walay labut sa personal natong kinabiuhi. Walay labut kon mag-bag-o ba kita sa dautan natong batasan. Moingon lang dayon ang 2023 nga it’s none of my business kon magbag-o ba usab ikaw uban sa Bag-ong Tuig.

Ang bag-ong tuig, usa ka dakung gasa gikan sa Langit. Busa, dako ang atong pasalamat nga miabot kita niining tuiga, ug giingon dinhi, Let’s make 2023 our best year yet. Ato nang ibutang sa kalimot ang 2022,

Somebody said: “Looking back on this year, I can’t help but be grateful for everything we’ve done together.” Niay uban nato hilabihan ka ungrateful. Walay utang kabubot-on, lakip ang mga utang limut-limotan lang. .

Sa negosyo: “Thank you for choosing and for always being a part of our business. We wish you a joyous and Prosperous New Year.