Ampo daygon

Kasagaran kun Pasko na gani manaygon ta. Atong ihalad ang mga paskohanong awit. Unya sa tumang kalipay magpaabot kita og gasa gikan sa atong gidaygonan.

Apan dunay mahinungdanong pagtulon-an nga gitudlo si Padre Aloy niadtong seminaristas pa mi.

Siya ang among rektor kaniadto. Alang niya dili paigo ang mokanta lamang unya mangayo hinunoa kinahanglang magdala pud kita og panalangin ingon man pag-ampo.

Hangtud karon nadala nako ang maong tradisyon. Bisan asa ko nga parokya akong gihimo kining maong balansayon.

Ang han-ay niini mao man ang pasiunang awit, pagbasa sa ebanghelyo ug pag-ampo sa panalangin alang sa panimalay dayon benditahan.

Nindot kini nga balansayon ug seguro ko nga malipay usab ang tagbalay.

Ang kalipay dili kabayran og salapi. Ang tinuod nga diwa sa Pasko dili man mahitungod lang sa party ug lingawlingaw.

Ang Pasko mao kadtong pag-inalagaray. Pag-inampoay ug pagpakabana sa panginahanglan aron ang tanan makaingon og “Kasadya Ning Taknaa!”