Tanan nilang binuang maoy matuman
Human sa mga pasalig sa Kongreso nga tarungon ang 2023 budget, nga usbon ang kuwestiyonableng mga sugyot sa Malakanyang, giaprobahan sa bicameral conference committee ang mosunod:
• P4.5 bilyones nga confidential ug intelligence funds (CIF) ni Presidente Marcos Jr., subra sa katunga sa budget sa iyang upisina;
• P650 milyones nga confidential ug intelligence funds ni Bise Presidente ug Education Secretary Carpio bisan sa paglaslas unta sa mga senador; ug
• P10 bilyones sa National Task Force to End Local Communist Armed Conflict (NTF-Elcac), bisan 2% ra sa ilang proyekto ang napatuman.
* * *
Napahinumdoman ta sa makausa pa nga bisan sa tanang pagarpar sa mga senador ug mga kongresista nga nagdugo ang ilang kasingkasing para sa labing naapiki ug nagkinahanglan nga katawhan, makabungog nga mayoriya sa Senado ug sa House of Representatives mga itoy sa administrasyon.
Ato na lang dawaton nga sa mosunod nga unom ka tuig, bisan unsay gusto nilang Marcos ug Carpio matuman. Di pa gani mahuman pagsugo nga layat gikan sa unsang andana, ang ilang mga kakonsabo magsugod na og untol. Nakapait kay kitang mga magbubuhis ang kanunayng mahagsa.
* * *
Mao sab ni mahitabo sa Maharlika Wealth Fund. Madayon bisan sa lehitimong pagsupak:
• Mas dinaliang mga gastohan pag-ayuda sa labing kabos, pagpalambo sa kahimsog ug edukasyon ug pagtukod og socialized housing;
• Mga pundo sa mga institusyon nga paamuton sa Maharlika nagkuwang nang daan para sa pension sa mga retirado ug pahuwam sa mga mag-uuma ug gagmayng negosyante; ug
• Supak sa balaod ang pagamit sa pundo sa SSS ug GSIS para sa di mga sakop ug sa peligrusong mga transaksiyon.
* * *
Ug bisan sa sukwahing mga panghinaut, ang administrasyon sa mga anak sa mga amahan nga wa mabantog sa kaligdong ug katakos motinuod sa tanan natong kahadlok:
• Mabangkarota ang Maharlika fund tungod sa pataka nga mga transaksiyon, pangurakot sa mga tagduma ug pagpaburot sa mga bolsa sa mga tigpasiugda; ug
• Kay garantiyahan man sa gobyerno ang pundo, ang tanang alkanse igo lang ipasa ug idugang sa bug-at nang daan nga mga palas-unon sa katawhan, nga gibinlan nang daan og makabungog nga utang ni kanhi Presidente Rodrigo Duterte ug apuradong gipasamot og paburot sa administrasyong Marcos.
* * *
- Latest
