Panginahanglan batok kadungganan

Gihukman sa Sandiganbayan ang kanhi aktor ug konsehal sa Quezon City nga si Roderick Paulate nga mabilanggo og hangtod 62 anyos sa kaso’ng graft ug malversation of public documents tungod sa giingon nga pag-hire og mga “ghost” employees niadtong tuig 2010. Ang nahitabo ni Paulate ehemplo sa pag-abuso sa katungdanan sa mga opisyales sa kagamhanan. Kon dili tamdon ang gabayan nga “Public Office is a Public Trust”, makahimo gayod ang opisyal og kahiwian. Haum sa nahitabo ni Paulate ang panultihon nga, “Nakig-ambas sa iyang panginahanglan ang iyang kadungganan”. Fezteleern!

Addict nga monghe

Gikataho nga wala na’y nahibilin nga monghe sa usa ka Buddhits temple didto sa probinsiya sa Phetchabun, Thailand human kini gi-raid sa kapolisan ug napalgan nga positibo sa metamphetamine ang tanan sa gipahigayon nga drug test. Gimandoan ang mga monghe nga mopailawom sa drug rehabilitation program. Makapakugang kining maong balita kay nagtuo man kita nga disiplinado ang mga monghe. Wala hinuon karateha sa mga monghe ang kapolisan nga mi-raid sa ilang temple. Matud pa bitaw sa mga addict, “Wala ma’y problema ang drugs, ang problema kay ang polis man kay manakop”. Pagkatoytoy!

Angay-angay lang

Buot ni Cebu City Mayor Michael Rama nga mopatuman ang Presidente og usa ka uniporme nga kantidad sa incentive nga ihatag sa mga Job Order workers sa kagamhanan. Ipadangat sa mayor ngadto sa presidente ang maong hisgutanan isip national president sa League of Cities of the Phillipines. Makiangayon ang maong sugyot sa mayor. Bisan dili sila empleyado base sa lagda sa Civil Service ug DBM, apan maisip ang mga JO nga kabahin sa workforce sa kagamhanan ug angayan nga hatagan og incentive sama sa mga regular ug casual nga empleyado. Ni’ng laraw sa mayor, haum ang panultihon nga, “Kon unsay makaayo sa gangsa, makaayo usab sa itik”. Paleho la!

Duna pa kaha’y madawdaw?

Gitahasan ni Presidente Bongbong Marcos, Jr. ang mga bag-ong embahador (envoys) sa pagpadayon pagpangita og mga oportunidad sa panagkumboya alang sa kalamboan ug negosyo sa Pilipinas ngadto sa uban’g nasud, higala man kini o dili. Makapahinumdum kanako sa kasinatian diin sugoon kami pagpanginhas sa hunasan nga nag-anam na kahanaw ang mga kinhason mao nga swerte-swerte na lang. Dakong hagit ug daw ulahi na kining dugang nga tahas nga gihatag sa presidente. Ang pangutana, sa hunasan sa oportunidad sa panagkumbuya sa kalamabuan, aduna pa ba’y kinhason nga madawdaw ang atong mga embahador? Sulayan lang!

Walay buot ipasabot

Mideklarar og moratorium ang BFAR sa ilang pasiunang kamanduan nga pagkumpiska ug pagdili sa pagpamaligya og mga imported nga pink salmon ug pompano diha sa ug magpabilin una kini hangtod aduna na’y bag-ong lagda nga mahimo ug mapatuman. Kon dili tataw ang katuyoan sa usa ka lagda, labi na kadto may kalambigitan sa panginabuhian, daghan gayod ang buot mopakgang niini. Ang mga kumplikado’ng lagda magdala kanato ngadto sa dili tataw nga kamanduan. Haum ang panultihon nga “Kon dili gani klaro ang buot ipasabot, dayag nga wala kini buot ipasabot.” Madahaan!