Way atrasay ha?

Ang pagmugna og estraktura ibabaw sa sapa diha sa dalan Colon pwerteng dugaya na gyud niini, apan wa pay mga mayor dinhi sa Cebu City nga adunay kaisog sa pagpaguba niini.

Sa unang paglingkod ni Mayor Michael Rama sa katungdanan, gisugo dayon niya ang Department of Engineering and Public Works (DEPW) nga markahan ang mga building nga nasakop sa three-meter easement.

Apan nahuman na lang ang termino ni Mayor Rama, wa gyud mahimoi og katumanan, wa maguba ang maong mga illegal structures. Karon sa iyang pagbalik gideklarar niya ang “gubat sa baha.”

Ang pagtukod og mga estraktura sama sa building ibabaw ug daplin sa kasapaan, apil na ang kabalayan, nakatampo gyud sa problema sa paglunop ug pagbaha.

Gikuha ni Mayor Rama si kanhi DENR secretary Roy Cimatu aron maoy mangulo sa gubat sa baha dinhi sa siyudad. Tuod, ang mga tagdumala sa mga estraktura nga gitukod ibabaw sa sapa diha sa Colon ug ubang mga sapa gipadad-an na og suwat.

Nag-awhag kini nga boluntaryo sila nga moguba sa illegal structure nga ilang gitukod diha sa daplin ug sa ibabaw sa kasapaan. Ang pangutana karon, mahimo kaha kini ni Cimatu?

Para nako, angay gyud kini nga pamatud-an ni Mayor Rama ug ni Cimatu nga adunay ngipon ang balaod nga ilang gisandigan, kay kon dili sila makapatuman sa balaod, kataw-an ra sila.

Unsaon, ang mga nagdumala sa City Engineers Office kaniadto nagpakabuta-bungol ra man sa mga pagsaway mahitungod sa pagtukod og estraktura nga anaa sa ibabaw sa sapa.

Unsa may imong pagduda nga wa man sila magtagad? Klaro kaayo uy. Maayo man og wa ta’y mga utok nga dili makasabot. Sama nianang bag-o nga estraktura sa dakong grocery sa Manalili nga anaa gihapon gitukod sa ibabaw sa sapa, gipahibawo gyud nako ang city engineer nga mao sab ang nagdumala sa Office of the Building Official.

Unsay iyang gisulti? Matud sa kanhi city engineer nga ang barangay maoy angay’ng moaksyon niini kay mas paspas kuno kon ang barangay maoy molihok batok sa mga illegal construction.

Mora ba og nanghunaw. Di ka ba magduda? Mao na nga ang katawhan karon nagpaniid kon unsay labok ni Cimatu kabahin sa maong mga illegal structures nga gitukod ug nakapagamay sa sapa, ug nga nahanaw na gyud ang sapa.

Bitaw, duna ko’y sugyot ni Mayor Rama nga kuhaon sab niya si Bayani Fernando, kadtong hepe kaniadto sa MMDA kay isog kaayo kini nga mangguba sa mga illegal structures nga nagbabag sa mga aseras.

Unsaon, diay atong mga opisyal dinhi sa ato talawan man kay mahadlok nga mapasakaan sila’g kaso.