Palusot sa PhilPost
Opisyal sa Philippine Postal Corporation (PhilPost) nga nakatsamba og tan-aw sa akong programang “Panahom sa Kilumkilom” sa YouTube ug Facebook nga naghisgot sa natanggong nga mga suwat sa ilang upisina nipasalig nga ila nang giimbestigar kinsay responsable sa pagkatanggong sa akong mga suwat.
Sa pribadong mensahe sa Facebook Messenger, nihangyo siya nga di lang una ilhon sa publiko kay wa pa siyay pagtugot gikan sa iyang mga labaw sa pakigsulti nako. Matud niya ipatawag dayon nila ang mga kawani sa post office sa Consolacion nga ilang gidudahan nga maoy nagpabaya.
* * *
Tulo ka suwat, nga natanggong na og pila ka buwan sa PhilPost, ang nagdungan og abot sa among pinuy-anan sa Casili, Consolacion niadtong Lunes sa hapon:
• Una, ang suwat gikan sa Philippine Statistics Authority (PSA) nga naglakip sa akong National ID nga dunay post mark nga June 7, 2022;
• Ikaduha, ang suwat gikan sa Google nga naglakip sa PIN sa monetization sa akong YouTube channel nga may post mark nga September 20, 2022; ug
• Ikatulo, ang suwat gikan sa BPI Insurance nga dunay post mark nga March 23, 2022.
* * *
Viewer nga nakabati sa akong pagbasa sa pasabot sa kawani sa PhilPost nga napakyas ang kartero paghatod sa akong ID kay way tawo ang among balay balido og obserbasyon:
“Atong application dunay cell number, ngano wala man gamita pag-inform nga available nang ID. Pasangil ra na nga walay tawo ang balay. Kami diri duna pirmi tawo hangtud karon wala pa ang ID sa akong mga anak. Among ID sa ako pares among giadto sa post office ug giingnan nming tua sa barangay. Natanggong og 3 ka bulan.”
* * *
Susamang kasinatian: “Pagkuha nako sa akong National ID sa Cebu City Post Office ako sad gihapit pagpangutana ang ID sa akong anak ug giingnan ko nga ang kartero nag-AWOL. Sus kita pa diay magproblema sa ilang responsibilidad.”
Abogado nga viewer nibasol sa post office sa kapakyas pagtambong sa iyang husay kay ang notisya sa korte nalangay og pila ka adlaw. Laing biktima: “SSS check refund sa akong anak na stale check kay wala ma deliver sa balay. It took one year na ilisan sa SSS ang stale check.”
* * *
- Latest
