EDITORYAL - Wa mo mahibulong?

Nganong mas mahal man gyud ang presyo sa tanang palaliton ug serbisyo dinhi sa Pilipinas kun itandi sa ubang mga nasud? Pangutana kini sa mga Pilipinong nakasuway na og pamalit didto sa abroad sa panahon nga didto pa sila nagpuyo o nagtrabaho.

Dili kini ikahimakak, gani, ang ilang usa ka dolyar mas daghan pa og mapalit nga mga pagkaon didto kun itandi sa P55.00 nga maoy balor karon niini kun dinhi sa Pilipinas.

Lain pang rason nganong kinahanglang mahibulong ang mga Pilipino, ang internet connection dinhi mas mahal ang binuwang bayad kun itandi didto sa ubang mga nasud.

Apan bisan mas mahal dinhi ang internet connection, ang Pilipinas maoy dunay kinahinayan og internet sa tibuok South East Asia. Sa ubang mga silingang nasud dinhi sa SEA, ang Pilipinas maoy kinahinayan mura og kuhol ang koneksyon niini sa internet.

Gani naila pa gyud ang Pilipinas nga social media capital of the world, apan nagmantenir lang og pwerteng hinaya nga internet connection. Base sa ranking, ika-158 kita gikan sa 190 ka mga nasud sa kalibotan sa internet connection.

Bisan gani ang pagkaon dinhi pwerte gyung kamahal. Usahay, imbes nga mas barato unta ang mga baligyang utanon, prutas, isda o pagkaon gikan sa mga kalungsoran sa probinsya sa Sugbu, mas mahal pa man hinuon itandi sa presyo diha sa Cebu City.

Ang rason sa mga naninda, kinompra ra pud diay nila gikan sa Cebu City, tinuod ni? Hain naman diay ang abot sa mga lapad nga kabukiran ug kaumahan ingon man hayopan o sa kadagatan aning mga lungsora? Namalhin na tanan sa Cebu City?

Mura lang ni og wala kaayo hatagi og pagtagad sa mga tawo, pero sakit-sakit gyud sa bulsa kay gamay ra ang suholan dinhi kun itandi sa manarbaho didto sa abroad.

Kinsa may sad-an ani? Dili ba ang mga tawong nagbotar og mga walay ayo nga mga politiko nga walay nahimo pagpaubos sa presyo sa palaliton o pagpausbaw sa saktong suholan?

Busgon ra og pasalig ug talo-taloan ang mga botante sa pag-ingon ‘agwantador’ ang mga Pilipino ug “kaya nato ni.” Apan diay kusog kaayong mangurakot.