Napriso tungod sa SALN

Nabalhog sa prisohan si Bogo, Argao, Cebu konsehal Danilo Gealon Pelomino niadtong miaging adlaw tungod sa iyang kapakyas sa pagsumiter sa iyang Satement of Asset, Liabilities and Networth o SALN. Hinuon nakagawas ra siya sa prisohan pagkasunod adlaw human makapiyansa sa kantidad nga P30,000.

Ang SALN usa kini ka deklarasyon sa kabtangan ug mga butang sama sa yuta, sakyanan, salapi nga gihuptan o anaa sa bangko, balay, mga gamit ug uban pa ug mga tulobagon o bayranan sama sa utang lakip na ang interest sa negosyo ug pinansiyal sa mga opisyal ug kawani sa gobiyerno, ilang asawa ug bana, mga anak nga ang edad ubos sa 18 nga miipon pa nila.

Ang pagsumitir sa SALN gimando kin isa Article XI Section 17 sa 1987 nga batakang balaud sa Pilipinas ug Section 8 sa Akta Republika Numero 6713 o Code of Conduct and Ethical Standards for Public Officials and Employees.

Ang mandato sa pagsumitir og SALN naglakip kini sa pagtugot sa opisyal o kawani sa gobiyerno sa Ombudsman o sa awtorisado niini nga representante sa pagtan-aw sa mga dokumento nga magpakita sa mga butang o kabtangan, mga tulobagon o bayranan, net worth, interest sa negosyo ug pinansiya nga koneksyon sa tanang ahensiya sa gobyerno.

Seryoso ang pagsumitir og SALN busa dili gyod ni puwede nga baliwalaon lamang sa mga opisyal ug kawani sa gobyerno. Mao ni ang rason ngano nga ang kanhi chief justice sa Korte Suprema nga si Renato Corona natangtang sa iyang katungdanan.

Ambot og nakalimot ba o wa lang gyod masayod si konsehal Pelomino sa kaso ni Corona. Kay kon wala pa siya makalimot, labing siguro nagkisi-kisi na siya sa pagsumitir sa iyang SALN ngadto sa buhatan sa Ombudsman.

Pero kun gituyo gyod sa konsehal ang pagmagahi sa iyang ulo, maingon nato nga siguro nakatilaw na siya og tagam.