EDITORYAL - Nagkahanaw nga tradisyon
![EDITORYAL - Nagkahanaw nga tradisyon](https://media.philstar.com/photos/2022/10/27/1_2022-10-27_22-40-47.jpg)
Karong adlawa palang nagsugod na og duaw ang mga tawo sa mga sam-ang aron ikauban ang ilang mga mahal sa kinabuhi nga nitaliwan na sa laing kalibotan.
Dunay uban nga karon na kini buhaton kay naglikay sila sa pagdasok-dasok unya sa mga tawo kun sa Nobiyembre 1 ug 2 pa sila moduaw sa adlaw gyud sa mga Santos ug sa mga Kalag.
Ang uban tuyo nga misayo kay ugmang adlawa Oktubre 29, adlaw nga Sabado, walay klase ug wala say trabaho ang uban, unya gideklarar nga non-working holiday ang adlaw nga Lunes Oktubre 31 motaas-taas gyud ang bakasyon.
Nindot baya kaayong dad-on ang kabataan sa pagduaw aron masilsil sa ilang hunahuna nga tradisyon kini ug pagpakita og pagmahal sa mga mitaliwan na nilang kabanay.
Apan tungod sa pandemiya ug dinutdotay ug ang dautang panahon mas labing maayong dili una magdala og mga gagmay’ng bata aron malikay sa sakit o ba kaha sa pagkawagtang.
Kaning tradisyon sa pagduaw sa mga lubnganan sa mga nangamatay ng minahal sa kinabuhi napasa na kini gikan pa sa katiguwangan ngadto sa mga nagsunod nga henerasyon.
Mao nga ang pagdala sa mga kabataan diha sa mga sam-ang hinay-hinay kining magtudlo kanila sa tradisyon nga namat-an sab sa ilang mga ginikanan. Nga ang mga minatay bisan wala na dili angay kalimtan ug pahinungdan gihapon sila og pag-ampo.
Subo lang kay daghan na sa mga tradisyon nga namat-an sa kadaghanan sa mga Pilipino ang hinayhinay nga nangawala kay wala na kini mapasa sa nagsunod nga kabataan.
Kini sama sa pagpangadye o pagpa-novena, pagpamisa, sa mga kalag. Makita sa kabataan karon nga mas daghan ang ganahang maglaag-laag inay nga moduyog sa pangadye diha sa ilang balay para sa ilang mga nitaliwang kabanay.
Gani karon ang uban dili na makapasabat o makapapangadye ug makahalad para sa ilang mga minatay kay pamisahan nalang kini sa simbahan. Ang uban, dili pa gyud tambongan ang maong misa.
Dili unta kini mawagtang o mapapas nga tradisyon tungod kay usa kini sa ilhanan sa pagka Pilipino.
- Latest