Walay kwarta ang 'Pinas

Prayoridad nga legislative agenda sa administrasyon ni Presidente Marcos, Jr., ang pagtukod og Department of Water Resources aron moatiman sa nagkadaiyang isyu kabahin sa kritikal nga suplay sa tubig.  Luyo sa maanindot nga tumong, dili malalis nga lain na usab kini nga hut-ong sa burukrasya. Makapahinumdum sa estorya sa nagkatagbo nga Kalihim sa Department of Finance sa Pilipinas ug sa Kalihim sa Department of Winter Sports sa Saudi Arabia.  Gipangutana sa taga-Pilipinas ang taga-Saudi ngano nga aduna sila’y Department of Winter Sports nga wala man sila’y winter season didto.  Mitubag ang taga-Saudi nga, “Parehas ra gud sa Pilipinas, aduna’y Department of Finance bisan walay kwarta inyo’ng nasud.”  Pagkatoytoy!

Gikawatan ang kawatan

Miresulta sa pagkadiskobre sa daghan’g mga kahiwian ang cleanup drive nga gipasiugdahan ni Mayor Michael Rama sulod sa impounding area sa dakbayan sa Sugbo nga nahimutang sa SRP.  Usa sa mga nadiskobrehan mao ang gatosan ka mga sako sa semento nga nibagtok ug dili na magamit.  Paimbestigahan sa Mayor ang maong kahiwian.  Baniog nga dili gyud maayong piyado ang kawani sa gobyerno.  Usahay ang nagbantay mao ra gani mounay pagsakiyo sa iyang gibantayan. Aduna pa gani komedya nga “sa impounding area, bisan nagbaga nga puthaw, mahanaw”.  Apan alang sa nagbuhat, “dili sala ang pag-kawat sa butang gikan sa kawatan.”  Madahaan!

Anak sa kahakog

Usa ka 67 anyos ang nasikop pinaagi sa entrapment operation nga gipahigayon sa kapolisan sa Caloocan City tungod sa kasong pagkalambigit sa annulment scam.  Nangayo ang suspetsado og 200mil pesos bugti sa pagpadali sa marriage annulment process sa ginikanan sa biktima.  Nabuko ang suspetsado tungod sa gihatag niini nga peke’ng court order kunohay sa annulment.  Adunay kamatuoran ang panultihon nga “Ang pagpangilad maoy anak sa kahakog”.  Apan alang sa mga mangingilad, walay kalainan ang kwarta nga nakita sa paagi’ng tinarong ug sa kwarta nga nakita pinaagi sa pagpangilad. Paleho la!

Walay dakop ang herbal

Sa susama’ng balita, tulo ka tawo ang gisikop kay nagpatoo nga sila mga enforcer sa Manila Traffic Parking Bureau.  Nadakpan ang tulo pinaagi gihapon sa usa ka entrapment operation human nila gidawat ang ilang gikilkil nga P 1,000, bugti sa pag-areglo sa traffic violation.  Sa kalisod ba kaha sa panahon karon, mao nga nahimo na’ng usa sa mga kahinguhaan ang pagpangilad.  Apan matud pa sa akong amigo, “Ang mga gagmay’ng mangingilad ra gyud ang dali madakpan.  Naay negosyo nga mga tambal nga Herbal nga gabansiwag sa radio ug TV, dili gyud hilabtan.” Fezteleern!

Lusot bisan nasakpan

Gibansay sa Philippine Coast Guard ang 20 ka police dogs sa tumong nga makatabang kini sa pag-detect pinaagi sa pagsimhot sa ipayuhot nga produkto’ng agrikultura sama sa ahos, sibuyas-bombay, asukal, processed meat apil na gani ang mga explosibo. Tapat sa katungdanan ang mga iro ug kon sila lang ang pabut-on, dili gayod makalusot ang ilegal nga mga produkto.  Apan adunay komedya nga “Iro ang magasugyot, tawo ang magbuot.”  Busa aduna gihapo’y purohan nga ang ilegal makalusot.  Muleeeng!