Patas nga hukom, makapatak-om

Mga abogado nakasabot unsa kalisod ang kahimtang ni Justice Secretary Jesus Crispin ‘Boying’ Remulla karon human masakpi sa akto ang iyang anak nga naghupot og ginadiling marijuana nga mobalor og P1M kapin.

Nasakmit ang marijuana sa Phiilippine Drug Enforcement Agency (PDEA), kinsa mipahigayon og buy-bust operation ug ila kining himoong lig-ong ebidensiya batok sa nasakpan atubangan sa hukmanan, aron si bisan kinsa mang abogadoha ang manalipod-laban kaniya, dili makatuis sa tinuod.

Gumikan niini, mora’g napiit si Remulla sa duroha ka dagkong bungtod: ang iyang pagka-amahan sa nakasalang anak ug ang pagka-mangangalagad sa katawhan isip maoy hari nga milingkod sa Departamento sa Hustisya. Kinsay iyang palabihon: ang gugma ngadto sa iyang anak, o ang gugma ngadto sa iyang gialagarang katawhan?

Kon unsay binuhatan sa anak, mosumbalik baya sa ginikanan. Ang ginikanan maoy nag-amuma sa anak. Nagtudlo unsaon sa pagsulti, pagbarog ug paglakang hangtod nga makatindog na kini sa kaugalingong mga tiil.

Suheto si Remulla sa batakang balaod sa Pilipinas. Nasayod siya unsay dangatan sa tawong masakpang nagpayuhot og illegal drugs? Gitisok ba kini niya ngadto sa alimpatakan sa mga pinangga niyang anak sukad niadtong unang adlaw nga makasabot nag unsay maayo ug daotang buhat?

Kining nahitabo sa iyang anak makahatag og ideya kon giunsa ni Remulla pag-alima ang nanagtubong dugo nga gikan sa iyang dugo. Tinuoray, husto na sa edad iyang anak. Dako na kining kahoy ug dili na mabawog ang direksiyon sa kinabuhi nga maoy napuntariyahan. Unsaon, bisag unsaon pa pagtudlog binuotan ang mga anak, anaa gyoy masaag. Busa, dili mabasol si Remulla sa iyang pagka-amahan.

Akong anhing Tatay Andot, kinsa construction worker ra tuod kadto, pero pirme ko niyang istoryaha’g kaligdong sa kinaiya sa mga maghuhukom diha sa pagpatuman sa patas ug dili mapalit nga balaod. Usa sa giasoy niya, kadtong bahin sa usa ka malditong anak, diin dihang nakasala sa balaod, ang iyang amahang huwes mismo maoy nagpadakop-pabilanggo kaniya.

Kaya kaha kining buhaton ni Remulla ngadto sa iyang anak? Kay kon kini pay nakab-ot dayon niyang hukom, segurado kong wala gyoy kritiko nga magsigeg sabasaba aron siya paresayinon. Sanglit ang patas nga hukom sa maghuhukom, sa baba sa mga marites, makapatak-om!