Ang Tawag kun Bokasyon Pasiuna

Katekesis No. 16 

Kun maghisgot kita og tawag kini nagagikan sa linatin nga pulong nga Vocare kun to call. Mao kini ang literal nga pagsabot ug kahulogan sa maong pulong bokasyon. Kay diha sa kinabuhing Kristohanon sa pagsugod pa lang sa atong kinabuhi nga tawhanon anaa na kitay kabutangan. Sa ato pa, walay gipahimugso nga aksidente ang tanang nahimugso dunay iyang dalan nga gisubay.

Ang  mga tawag Unibersal

1.    Ang tawag sa Pagkabalaan

Kitang tanan gitawag aron mamahimong mga balaan. Maingon nga ang Dios balaan kita usab kinahanglang magpuyo ug magsubay sa dalan nga balaanon.

2. Ang tawag sa Paghigugma

Ang gugma maoy rason kun hinungdan kun nganong mamahimo kitang maningkamot nga pilion nato ang dalan sa paghigugma kaysa pagdumot. Ang paghigugma usa man ka matang sa pagkinabuhi nga angayan natong pilion adlaw adlaw sa atong kinabuhi.

3. Ang Tawag sa Pangalagad

Ang atong Ginoo nianahi aron moalagad ug dili aron alagaran. Segun sa atong kapasidad ug kahimoan kitang tanan gitawag aron mamahimong maalagaron sa uban nga mas nagkinahanglan pa kay kanato. Sila nga nagkinahanglan sa pagtagad. Ang si kinsa ang buot nga mamahimong labaw sa tanan kinahanglang mamahimong ulipon sa tanan.

Ang mga Nagkadaiyang Dagway sa Tawag/Bokasyon

1. Tawag sa Pag-Inusara kun Single Blessedness

Dunay mga tawo nga wala maminyo apan wala sila mamahimong pari o relihiyoso. Ang ilang pag-inusara dili kahuyangan hinunoa ang ilang pag-inusara usa man ka gahom ug kusog aron makahatag sila og igong panahon diha sa  ilang apostolikanhong paningkamot.

2. Tawag sa Kaminyoon

Ang atong mga ginikanan ang nitabang sa Dios sa pagtukod sa iyang banay dinhi say uta pinaagi sa mga banay nga tawhanon. Ang pamilya mao gyud unta ang atong unang simbahan diin ang pagtulon-an nga Kristohanon gitudlo ug giampingan pinaagi sa atong unang mga magtutudlo nga mao ang atong mga ginikanan.

3. Tawag sa Pagkapari ug Pagka Relihiyoso

Dunay uban nga nipili niining maong matang sa kinabuhi aron sa ingon mamahimong mapadayon ang kalihukan ni Kristo Jesus alang sa kaluwasan sa katawhan. Ang pagdumala sa mga Sakramento, ang pagpakaylap sa pulong sa Dios mao man ang mahinungdanong timaan sa kang Kristong gugma alang kanatong tanan. Gipuy-an nila ang tulo ka mga panaad sa pagkamasinugtanon, pagkaputli, ug ang pagkakabus. Sila ang gipili aron dad-on ang tanan.