Modus hasmag kaluha sa pangilad

Naglabad ang ulo ni Barangay Kapitan Lourdes Ramirez tungod sa kadaghan na sa reklamong iyang nadawat bahin niining hamtong nga babaye, kinsa gihimo na lang niyang inadlaw’ng kapanginabuhian ang modus-pahasmaghasmag sa sakyanan nga moagi aron daling makakuwarta.

Ang naasoy’ng babaye, magpatuo nga naigo o natapsingan sa sakyanang mataymingan sa iyang drama. Magpakaaron-ingnon nga nadam-agan. Busa, mapugos ang drayber sa paghunong ug mosusi sa kahimtang niini.

Dinhi magsugod ang negosasiyon, diin tungod kay dili gustong malangay ang drayber, mouyon na lang sa sugyot sa babaye nga hatagan na lang kinig kuwarta. Kay sa ipaabot pa kini sa kapolisan.

Nakaeksperensiya ko niining susamang hitabo dihang may gihatod ming higala ni misis sa Cebu South Terminal.

Daghan kaayong tawong nanglakaw sa kadalanan niadtong higayona. Dili makabuylog dagan ang gimanehong sakyanan. Apan nahibulong ko. Nganong sa kahinay sa among aginod, kalit lang may mihasmag kilid sa sakyanan ug nagpasurasaysurasay.

Dali ra kong naka-brake. Ug nakita ko ang nagping-it nawong sa tawong nagbarog nga miakbo sa sa giablihan kong bentana. Gipangutana dayon nako, kon unsa bay nahitabo niya?

Sanglit, bisan gamay, wa man ko makamatikod nga adunay milagubo? Hinuon, dali kaming duha ni misis midesisyon-tanyag nga dad-on kini sa kinadul-ang ospital, aron matsek-ap. Apan sa padayon namong pamugos nga dad-on siya’g tambalanan, hugtanon gayod siyang mibalibad. Gumikan sa kabalaka ni misis, nga ma-charge mig hit and run, mitambag nako, nga hatagan na lang og P200 ang tawo. Ug diha pa kini molakaw palayo sa among sakyanan dala ang nailad namong P200 nga kantidad.

Hinungdan, nga maka-relate g’yud ko sa mga drayber, kinsa mipadangat sa ilang reklamo ngadto ni Kapitan Ramirez human mangailad sa modus-padam-agdam-ag niining edaran nang babaye, nga nakahatag og dakong kasamok sa mga biyahidor.

Naaksiyonan na baya kini sa kapitan. Nahipos-hatod na ang gireklamo didto sa gipuy-an niini sa Ermita. Apan matud pa, pipila ka adlaw’ng nakalabay, mibalik na sab sa iyang naandang salawayong buhat, diin, daghan nang nabiktima.

Kining iyang modus-pahasmaghasmag kaluha sa pangilad. Walay epekto kon igo ra siyang ihatod didto sa iyang pinuy-anan agig silot. Kon dili, mas epektibo kon sa prisohan siya permanenting papuy-on. Siyaro’g maglabad pa ang ulo sa kapitan.