EDITORYAL - Pagpabaya sa ginikanan
![EDITORYAL - Pagpabaya sa ginikanan](https://media.philstar.com/photos/2022/10/10/3_2022-10-10_23-38-36.jpg)
Migara na sab kining mga panagbingkil sa mga kabataan, ang uban kanila mga menor de edad nga nasugamak og barkadang parehas nila wala matarong og disiplina sa mga ginikanan.
Sa nanglabay nga mga adlaw nasaksihan sa publiko ang mga balita bahin kagubot nga gikalambigitan og mga batan-on, kadaghanan mga wala pa sa hustong edad ug nahitabo kini panahon sa disoras na sa gabii.
Lahi maghunahuna ang mga kabataan kun itandi sa mga sakto na sa edad ug mga hamtong. Init pa kaayo sila og dugo ug daling masilag sa kaparehas nila og edad.
Labaw sa tanan, dali silang mahaylo pagapil og mga grupo kon diin sa ilang paminaw respetuhon ug tahuron sila nga patas. Nangita sab sila og molaban kanila nga walay kondisyon o walay pakapin nga kasaba o maymay.
Ang ilaha basta magkasinabot lang tanan, bahala na ang ugma kun asa sila dad-on sa ilang buhaton, maayo man o gidili sa balaod, basta ang ila, barkadahay nga tinud-anay.
Kanang ini og magtapok, walay laing hisgotan kondili ang kaparutan o makabawos o ba kaha mangursunada sa laing grupo. Duna pay uban malambigit sa ilegal nga drugas, petty crimes, pre-marital sex nga dili protektado ug daghan pang uban nga pulos tanan makapahunong sa kaugmaon sa kabataan.
Apan mao ba kini ang tinud-anay nga barkadahay? Ang maamong ang mga kauban sa grupo nga wala gani ang uban masayod kun unsay gibuhat sa ilang mga kauban sa nanglabay nga mga adlaw?
Ang maguba ang kaugmaon kay ang uban napatay o nabakol tungod sa karambola, dunay uban mapriso kay nakahinayak og bayolenteng buhat ngadto sa mga karibal nga grupo?
Kaning tanang dili maayong gidangatan sa mga kabataan karon, biktima man o ba kaha maoy nakasala, mabasol ngadto sa iresponsable nilang mga ginikanan.
Mga ginikanan nga nagtuong ang ilang pagkaginikanan dunay limitasyon kutob lang sa pagpanganak, pagpasinina, pagpakaon ug paghatag og allowance.
Dili unta kalimtan sa mga ginikanan nga kabahin sa ilang kaakohan isip mga ginikanan ang pagdisplina, pagtudlo og maayong pamatasan, pagtudlo sa mga anak aron sila may kahadlok ug magmahal sa Diyos ug paypayan ang ilang emosyon aron sila mas mamahimong responsableng molupyo sa nasud ug hagiton sila nga makahuman sa pagtungha ug mailhan tungod sa maayong nabuhat og dili krimen.
- Latest