Mabasol ba guwardiyang nanulis?

Makapahinuklog! Tiaw bay, usa ka guwardiya sa tambalanan sa lungsod sa Pinamungajan, tungod kay wala nay ikapalit og pagkaon para sa iyang asawa ug sa unom nila ka anak, naaghat na lang intawon sa pagpanulis?

Base sa imbestigasiyon sa mga mirespondeng polis human nila madakpi ang guwardiya, kinsa normal rang mitrabaho gihapon sa nahisgotang ospital, nasayran nga sugod Hulyo pa diay niining tuiga ug hangtod ning pagsulat, nga wala pa kini masuweldohi.

Pila bay suweldo sa mga guwardiya karon? Sagad, kapin kun kulang, P430 ra. Unya, dili pa dayon suweldohan sa ahensiya o employer? Ning nagkalisod tang panahon, diin ang suweldo sa mga ordianriyong mamumuo nagpabiling gamay samtang ang presyo sa tanang palaliton naglumbaanay lang sa pagsaka, dapat ‘on time’ gayod ihatag ang ilang suholan.

Hinungdan, nga dihang nagbansiwag ang balita: ‘Wa Suweldohi, Sikyu Nanulis’, ‘Nanulis Aron Pamilya Makakaon’, morag gikumot akong dughan samtang nagbasa sa tibuok detalye niini. Kagutom sa iyang pamilya ug ang ka-walay kuwartang ikapalit og pagkaon maoy nagtukmod sa guwardiya pagpanulis.

Klaro kaayong walay intensiyon sa pagpatay’g tawo ang security guard. Diin didto ra sa ubos niya gipunting-pabuto iyang armas agig panghadlok sa duha ka pump boy. Ug dihang hawan na ang palibot, dinha na niya makuha ang P4,250 nga halin sa gas station. Kuwarta ra gyoy iyang tuyo.

Gani, wala siya motago human sa hitabo. Padayong mitungha sa iyang trabahoan. Diin, giplastar sa parkinganan ang gigamit niyang motorsiklo sa pagpanulis. Ug deretsong miangkon sa mao niyang pagpanulis atubangan sa mga polis, kinsa iyang gitug-anan nga napugos lamang siya pagpanulis kay wala nay ikapakaon sa iyang pamilya, sanglit tulo ka bulan na mang wala siya suweldohi sa hingtungdang ahensiya.

May tulobagon baya ang ahensiya. Tungod kay sa wala nila pagsuweldo sa guwardiya, naangin ang tibuok pamilya ug nagutman pag-ayo. Nga maoy nakapaguba sa iyang hustong paminsar, diin human sakdapi sa hulhog sa yawa, natental gayod sa pagpanulis.

Biktima lamang ang guwardiya sa giatubang niyang dakong suliran, nga minugna ra usab sa tawo. Nasayop tuod siya pagsulbad, pero dili siya mabasol. Hinunoa, angay pang kaluy-on ug pasayloon. Kay bisan tuod nanulis, gipakita iyang ka-honest – pag-angkon dayon sa salaod niyang nabuhat.