EDITORYAL - Lisud apan dili imposible
![EDITORYAL - Lisud apan dili imposible](https://media.philstar.com/photos/2022/09/16/edi_2022-09-16_21-17-11.jpg)
Ang tanang panaw o tinguhang kab-uton magsugod gyud sa unang tikang. Ang masuso magsugod una sa pagkamang una pa makalakaw, matud pa sa panultihon.
Matinud-anon kaayo nga giangkon ni kanhi environment secretary Roy Cimatu nga lisud kaayo ang tinguhang buhion og balik ang mga sapa sa dakbayan sa Sugbu, partikular ang pito ka mga dagkong sapa sa siyudad nga hagbay rang nangamatay.
Ang pagkamatay sa mga kasapaan sa siyudad binuhatan sa mismong mga nagpuyo sa siyudad. Angkunon man kini o dili, mao kini ang tinuod. Ang responsable sa pagkamatay niini mao ang mga tawo tungod sa ilang pagpabaya.
Mabasol niini dili lang ang mga ordinaryong molupyo kondili hasta ang tanang mga nanglabay nga mga opisyales sa dakbayan. Tinuod dako sila og natampo sa kalamboan sa siyudad, apan napagan sa maong kalamboan ang kinabuhi aning mga sapa sa dakbvayan.
Kaning maong mga sapa kaniadto aduna pay makuhang mga isda nga makaon pa sa mga tawo, apan sa kadugayan, bisan kadtong kinalig-onan nga klase sa isda nga makaagwanta sa mga kausaban sa tubig nga ilang gipuy-an wala na sab makaapas ug napapas gyud sila.
Karon ang mga sapa sa siyudad patay na, nabuni na sa baho ug itom nga lapok. Wala nay isda kay bisan ang ilang natural nga mga pagkaong lumot wala na sab makaagwanta sa kahugaw niini.
Husto si Cimatu, pagkakita palang niya sa mga sapa nga buot buhion nakaingon gyud siya nga lisud kini kaayong buhaton. Basin dili sa iyang henerasyon mabalik ang kinabuhi sa maong mga sapa.
Ang nakaayo lang sa iyang pamahayag nga “basin dili sa iyang henerasyon” sa ato pa wala pa siya gyud hingpit nawad-an og paglaum. Basin sa sunod pang mga henerasyon sa mga kabataan karon makab-ot ang maong tinguha, subo lang dili na kita makakita niini.
Lisud apan dili imposible, kung buot sabton og maayo ang iyang mga pamahayag. Nagpasabot kini nga may paglaum pa nga mabuhi kini pagbalik apan kinahanglan nga aksyonan na kini karon palang ug dili na unya-unyaon pa.
Karon nga nahinaykan naman, mas maayong seryusohon ug tinud-on sa siyudad ang pagbawi sa 3-meter easement zones aning mga sapa, way pilion bisan kinsa, demolison ang nakababag sa mga sapa.
- Latest