Panggaon ang kalikopan aron kita panalipdan

Kong panalipdan nato ang kalikopan mao usab kini ang manalipod kanato gikan sa kabangis sa kinaiyahan. Apan kong abusohan nato mao usab kini ang mohatod kanato sa kaalautan.

Niadtong pag kusokuso sa super typhoon Yolanda sa tuig 2013 hilabihan ka dako sa kadaut ang namugna apil na sa mga kinabuhi ang nakalas.

Apan sa lungsod sa Tudela sa Isla sa Camotes wala sila magrabehi niadtong panahona. Ni bisan usa ka kinabuhi walay nakalas ug ang ilang mga kabtangan wala kaayo malampornas sa bagyo.

Ang gitumbok nila nga nanalipod sa ilang dapit mao ang halapad nga mangrove forest o katunggan. Kini matud pa ni Mayor Greman “Jojo” Solante diin gipalibotan ang ilang lungsod sa Tudela sa mga higanting punoan sa tungog.

Ang gamhanang hangin ug ang mga higanting bawod napugngan sa mga punoan sa mangrove, hinungdan nga gipahugtan pa nila ang pag amping sa halapad nga katunggan.

Gani nagplano ang LGU sa Tudela nga ilusad ang Katunggan Festival nga maoy ihulip sa Balanghoy Festival isip pagpalampo pa sa ilang environmental tourism.

Dili man hinuon mawani ang balanghoy kay ibida gihapon kini pinaagi sa lamiang puto nga kinaham nga kan-on sa mga.tawo.

Balikan nato ang kamahinungdanon sa pag-amping sa atong kalikopan, aduna nay daghang kalihokan nga nagtutok kubo sa environment apan mora’g kutob ra man sa baba o publicity kay wala man gyuy nahimo nga kongkretong lakang nga mapugngan ang pagpatag sa kabukiran, pagpamutol sa kakahoyan kay gi-develop na sa isip mga pinuy-anan sa mga tawo.

Hangad sa bukid di ba klaro kaayo ang ebidensya busa dili na nato ikatingala nga nasinati nato ang pagbaha kay wala namay mga kahoy nga makaali sa tubig.

Niadtong Biernes lang adunay mga balay gipang-anod sa baha sa Mandaue City kay hilabihan ka dako sa baha gikan sa bukid, kining scenario murag kadto pa nato makita.

Kong magpadayon pa gani ang pag-abuso sa kalikopan mangambot nalang kita sa mosunod nga kastigo sa kinaiyahan.