Kalabad sa burot nga baterya
Tungod sa kadaghan na sa gimbuhaton nga mahimo sa bag-ong mobile phones, ang mga baterya nga sa panahon sa ilang katiguwangan molungtad og pila ka adlaw di nang kalahutay og usa ka adlaw. Maong nagtukaw ang manufacturers sa paghimo og mga baterya nga mas taas og utong, mas maayo kon mas gamay aron nga mas monipis ang sunod nga henerasyon sa mga telepono.
Dihang nabulilyaso ang unang mga pagsuway, mas agresibong manufacturers nanghilam-os sa kauwaw dihang nibutong mga baterya, kasagaran nila nidangop sa mas luwas nga alternatibo: Paspas nga charging.
* * *
Ambot kinsay nakahunghong nako, ug ambot nganong nituo ko, nga ang mga telepono sa China maoy kinakusgan og baterya sa way pagsakripisyo sa kalidad sa display ug kaabtik sa applications. Pero, atu-ato ra ni, ang nakakumbinser nako maong kabarato.
Natsambahan nako ang brand nga giila nga numero uno (sa ato pa, kinadaghanan og halin) sa Pilipinas. Bagis tuod ang baterya, siga kaayo ang screen, dakong memory para sa bisan unsa na lang apps nga akong gisuwayan ug wa mabuslot ang akong bolsa. Bahala na lang nga bati ang camera.
* * *
Human sa pila ka buwan, akong nabantayan nga niburot ang bukubuko. Hangtod nga nikang-a ang tabon sa luyo. Ako lang untang pasagdan dihang may nakasugyot, ug nituo dayon ko, nga masulbad ang kang-a pinaagi sa glue.
Tuod man, nitak-om pagbalik ang luyo. Human sa pila ka adlaw ang pikas nga bahin na sab ang nibuka. Papitlan na sab unta nako og glue pero mas dako nang kang-a. Akong nabasahan nga ang hinungdan mao ang pagburot sa baterya.
* * *
Daghan ang posibleng hinungdan: Nasobrahan nako og gamit, o nasobrahan og charge, o nabiyaan nako sa init, o depekto sa pabrika. Dunay nisugyot, pero wa nako motuo, nga puston og selyado nga plastik ug ibutang sa freezer aron mohiyos.
Nakumbinser ko nga ang bugtong sulbad mao ang pag-ilis sa baterya. Basahon pa nako ang pino nga mga letra sa model sa baterya ug kon duna bay mapalit sa Lazada.
O moadto na lang sa service center kon makalugar. Mamili pa ko unsay mas barato. Sa kasamtangan, nausab ang akong linakwan. Kay mas burot nang akong bulsa.
* * *
- Latest
