Prodigal son

Septiyembre 11, 2022:  Ikakawhaag-upat nga Domingo sulod sa tuig G (C)

Mga Pagbasa: Ex. 32;7-11, 13-14/Sal. 51/1 Tim. 1;12-17/Lukas 15;1-32

Ang Ebanghelyo nagpadayag sa ka maayo sa Dios ngadto sa tawo. Andam ug tagana siya nga mohatag og kahigayonan sa giisip niyang mahinungdanon. Sa laktod ang tanan bililhon sa mga Mata sa Dios.

Kulturanhong Pagpasabot

1. Patriarchal ang katilingban kaniadto. Gikan kini sa pulong “Patros” kun amahan. Kaniadto dili mahimong mabahin ang katigayonan samtang buhi pa ang Amahan. Sa dihang nangayo ang manghud nga anak sa iyang bahin sama ra nga iyang gipangayo nga mamatay ang iyang amahan.

2. Ang maguwang dunay may dakong katungod sa inheritance dili ang manghud. Usa ka dakong anomaliya ang gihimo sa maong manghud.

3. Human nimo madawat ang imong bahin isip anak dili mahimong ibaligya kini. Magpabilin ka kun asa ang luna alang kanimo nga gimbut-an sa imong amahan. Sa dihang ang manghud nibiya ug nilangyaw sa laing dapit sama ra nga iyang gisalikway ang iyang kaliwatan ug banay. Usa kini ka katilingbanong sala nga nagkahulogan og silot sa kamatayon.

4. Ang Mga Buhat sa Amahan

a.  Nagdali siya pagsugat sa iyang anak aron dili kini maabtan sa mga tawo nga mohimong mobato niini tungod sa binuhatan niini.

b. Gipasul-ob ang pinakanindot nga bisti timaan sa iyang pagdawat, singsing nga nagpabalik sa iyang katungod isip anak ug ang sapatos nga nagsimbolo sa iyang dignidad.

c. Gipaihaw ang mga nating baka alang sa kombira aron masinati sa anak ang dignidad nga nawala gumikan sa iyang gibuhat. Nagpaila lamang kini nga dili na siya mahimong hilabtan ni bisan kinsa. Social reconciliation kining maong ritwal. Ang amahan buot mopahibalo nga gipasaylo na ang iyang anak busa dili siya angay nga patyon.

5. Ang Maguwang

Wala makadawat kinit ungod kay ang iyang pagsabot sa pangalagad ug pagkamatinud-anon nagasukad man sa reward and punishment basis. Kay nialagad siya ug nagtinarong kinahanglan siya og ganti. Usa ka dakong insulto kini ngadto sa iyang Amahan. Managsama silang nakasala apan bisan pa man niini managsama silang gipasaylo, ug gipangga.

Kasinatian

Adunay mga higayon nga kita nahisalaag sa atong kinabuhi. Kining maong pagkahisalaag maoy nakapahimo kanatong vulnerable sa bisan unsang pagbanhig kun pag-atake. Dakong kalipay sa Magbalantay nga makita ang nawalang karnero. Kini tungod kay ang maong Nawala lulid ug mahuyang. Sa ato pa nameligro. Dako ang kalipay sa magbalantay kun kini makaplagan. Sa laing bahin, ang sensilyo nga Nawala mahinungdanon kaayo alang sa tag-iya kay bisan siya sensilyo lamang apan dili mahimong matibuok ang kantidad kun wala ang mga sensilyo niini. Mas malipay ang Dios nga dunay makasasala nga maghinulsol. Dili siya buot sa kamatayon sa usa ka makasasala.

Lihok/Hagit

Sa dili pa kita mohukom, sud-ongon una nato ang atong kaugalingon. Moduol kita sa Sakramento sa Pakighiuli. Tinguhaon nato ang pagbag-o.

Pangamuyo

Tanan: Amahan Nakasala Ako kanimo… Dili na ako takus nga tawgon nga imong Anak…. Isipa na lamang ko nga usa sa imong mga sulugoon. Sa Imong Grasya himoa akong bag-o, segun sa imong kasingkasing ug kabubut-on. Amen.