Wa bayri ang mga alahas

Dear Atty. Divine,

Ang akong amiga mikuha nako og mga alahas aron ibaligya. Ang among sabot nga hatagan siya og commission nga 15% sa matag alahas nga iyang mahalin. Ako siyang gikondisyunan nga kun di mahalin ang alahas nga iyang gikuha sud usa ka buwan then iya kining ibalik nako. Sa una namong transaksyon, nahurot og kahalin ang iyang gikuha nga mga alahas ug ako siyang gihatagan og commission. Apan sa ikaduha namo nga transaksyon wa na man siya motuman sa among sabot, wa niya i-remit ang halin ug wa sab niya i-uli ang mga alahas. Ako na siyang gipadad-an og demand letter kay dako baya nga kantidad sa mga alahas ang iyang gikuha apan wa man siya motubag. Di sab siya mo-reply sa akong mga text og tawag. Unsa may angayan nako nga buhaton? Daghang salamat. —Jean

Dear Jean,

Mamahimo kang mopasaka og reklamo batok sa imong amiga ngadto sa barangay diin siya nagpuyo aron kamo magka-atubang ug magkasabot. Apan kun di siya moatubang kanimo sa barangay then imo nalang gyud siya nga pasakaan og kasong Estafa. Basi sa Article 315 (1) (b) sa atong Revised Penal Code mamahimo nga pasakaan og kasong Estafa ang si bisan kinsa nga mo “misappropriate” or mo “convert” sa kwarta o sa goods og uban pang personal property nga anaa kaniya. Sa ato pa, ang kapakyas sa imong amiga pag-remit sa halin o pag-uli sa mga alahas makonsiderar nga kalapasan sa maong balaod og mamahimo nimo siyang pasakaan og kasong criminal tungod sa iyang gibuhat. Sa kasong Estafa kinahanglan nga imong pamatud-an sa korte kining mosunod: 1) Nga iyang nadawat ang mga alahas nga dapat unta niya ibaligya 2) Wa niya giremit ang halin or wa niya giuli ang mga alahas 3. Tungod sa iyang gibuhat na-alkanse ka or ikaw na hinuon ang nakabayad sa maong mga alahas sa imong supplier 4. Imo na siyang gipadad-an og demand letter aron i-remit ang halin or iuli ang mga alahas nga iyang gikuha apan wa kini niya buhata. Kun imo kining mapamatud-an hayan makombikto gyud ang imong amiga sa maong kaso. Apan mas maayo nga imo una siyang hatagan og higayon pag-settle sa iyang obligasyon kanimo sa dili ka pa modangop sa korte. Thank you and God Bless. —Atty. Divine

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.