EDITORYAL - Imperial Manila  

Nahimo karong kataw-anan ang pipila ka mga ahensiya sa gobiyerno mahitungod sa pagbantay sa coronavirus disease (Covid-19) kay karong bag-o sila na mismo ang nirekomendar nga mahimo nang dili mandatory ang pagsuot og facemask sa gawas sa panimalay.

Kini human nga mikisikisi ang pipila kanila tungod sa mga polisiyang gipatuman sa Cebu partikular ang gihimo nilang Cebu Governor Gwendolyn Garcia ug ning bag-o si Cebu City Mayor Michael Rama .

Silang duha maoy unang mga local chief executives nga nangahas pagpagawas og kamandoan ubos sa ilang mga hurisdiksyon nga himuon nalang nga optional o dili na mandatory ang pagsul-ob og facemask sa gawas sa panimalay gawas lang sa mga piniling mga lugar sama sa mga tambalanan ug klinika.

Sa dihang gipagawas ni Garcia ang direktiba nga dili na mandatory  ang pagsul-ob og facemask gawas sa ilang mga balay, nakabangi niya ang Department of Interior and Local Government ug ang Department of Health.

Ang duha ka ahensiya miinsister nga kinahanglang angnasudnong polisiya pakigbatok sa pandemiya ang sundon sa tanan. Mga polisiya ug guidelines  gikan sa Inter-Agency Task Force sa panahon ni kanhi presidente Rodrigo Duterte.

Ning bag-ohay lang sab, si Rama mipagawas sab og susamang direktiba.

Salig ang duha ka lider sa bakuna batok sa maong sakit nga gipangusgan sa gobiyerno, ikaduha, kinahanglang makalingkawas ug mabalik ang tanan sa normal gikan sa kabalaka anang Covid-19.

Paspas sab kaayong nakapagawas og komento ang mga maayong-laki didto sa kaulohan nga miingon nga kinahanglang parehas ang tanan nga motuman sa mga guidelines. Naengganyo na tingali sila kaayo sa ilang gahom mao nga hasta ang kagawasan nga mandato sa mga Local Government Units ilaha nang hilabtan.

Apan kagahapong adlawa ang Malacañang mipahibalo nga ang pandemic task force sa gobiyerno mirekomendar kang Presidente Ferdinand Marcos Jr.nga boluntaryo nalang sa mga tawo kun magsuot o dili og facemask sa gawas sa ilang mga panimalay, ug kini matud pa dunay “verbal approval.”

Kinsa may naglangkob aning pandemic task force sa gobiyerno? Dili ba mao rang mga ahensiyaha o departamento nga mikontra sa mga gihimo nilang Garcia ug Rama? Kun sa Cebu gikan daghang kuskos balungos.