Sirado ang dalunggan

Ning panahon karon diin nagkadaghan ang mga “marites,” miawhag si Cardinal Tagle sa mga Katoliko sa pag-abli sa ilang mga dalunggan sa pulong sa Diyos ug sa pag-alagad sa mga kabos ug nanginahanglan inay sa mga tsismis sa mga libakera. Nabatyagan sa Cardinal nga mahadlok ang tawo nga maawahi pagkahibalo sa tsismis. Tukma ang panahom ug obserbasyon sa Cardinal. Daghan ang moingon nga dili sila ganahan ug tsismis apan sa tinuoray malipay ug malingaw sila sa pagpaminaw niini. Matud pa sa pagya, "Kon pagkaon pa ang tsismis, daghan na unta kaayo ang “overweight.” Fezteleern!

Balik-balik nga suliran

Tungod sa kaubos sa presyo, inay ibaligya ang iyang abot nga repolyo, gipangtadtad na lang sa usa ka mag-uuma sa Benguet Province ang iyang abot aron himuong abuno. Ang presyo nga P5 matag kilo ubos ra kaayo itandi sa gasto sa pagpananom. Namahayag ang Department of Agriculture nga dugay na silang nasayod sa maong suliran sa mga mag-uuma apan subo palandongon nga wala gihapon kini maatiman. Haum ang panultihon nga “Ang pag-awhag sa gobiyerno nga sulbaron ang suliran sa gobyerno, sama ra usab nga nag-awhag ka sa cancer nga ayohon ang sakit nga cancer.” Pagkatoytoy!

Mokanta bisan yabag

Gisapot ang mga lokal nga opisyal didto sa Cagayan de Oro City tungod sa nagkayabag ug sintonado nga pag-awit sa grupo sa mga kalalakin-an atol sa Miss Cagayan de Oro coronation night. Sayon sabton ang reklamo sa mga lokal nga opisyal. Dakong kalihokan sa dakbayan ang maong beauty pageant ug dili angay mantineran nga maoy mahimong hinungdan sa kaulawan. Sakit sa dunggan paminawon ang yabag kon moawit apan dili sila kapugngan ky ginaingon man usab nga “Tungod ba lang kay yabag ko, di na diay ko mahimong moawit?” May’pag moligeed!

Gikaulaw ang kustomer

GisIkop sa kapolisan ang hubog nga babaye’ng kustomer sa videoke-han sa Mandaue City nga nakahimog kadaot sa mga kabtangan sa maong establisemento. Segun sa imbestigasyon, gibiyaan sa iyang live-in partner ang maong babaye nga lagmit maoy hinungdan sa iyang pagmaoy. Basin niinom ug naghubog ang maong babaye aron malimot siya sa iyang “mapait” nga kasinatian. Apan angayan niyang tamdan nga “Walay tigbuhat og bino nga nag-advertise sa ilang produkto ginamit ang tawo’ng hubog. Tingale gikaulaw nila ang ilang kustomer”.  Madahaan

Government employee na

Mipasaka og balaodnon si Senador Bong Go nga nagtumong sa pag-modernize sa burukrasya sa kagamhanan aron mapa-uswag ang kabatid, ka-epektibo ug ka-angayan sa publikong pagpangalagad. Daghan na ang balaod nga gitumong sa pagpalambo sa pagpangalagad apan daghan gihapong empleyado ang wala magtamod sa ilang katungdanan. Makapahinumdum sa sugilanon sa kugihan ug buotan nga kabaw nga sa dihang napalit na kini sa Department of Agriculture, natapulan na man hinoon ug magsige na lang ug lunang inay modaro. Sa dihang gituki kon ngano, mitubag ang kanhi tag-iya sa kabaw sa pag-ingon, “Natapolan na ang kabaw kay ‘government employee’ na man siya.” Atala lage