Gibaligya ang property sa paryente

Dear Atty. Divine,

Dunay property sa among probinsya ang among mga ginikanan nga ilan gipabantayan sa among relative. Sa dihang nasakit ang among parents, nakahuna-huna mi sa pagprenda sa property aron ibayada sa hospital bills. So mi execute among ginikanan og Special Power of Attorney nga naghatag og authority sa among relative sa pagprenda sa  property. Karong bag-o sa dihang mibisita ko sa among yuta, nakurat nalang ko kay aduna na may nagtukod og balay sa property sa among ginikanan. Akong na-estorya ang nagpatukod niini ug matud niya nga iya daw nga napalit ang maong property gikan sa akong ig-agaw. Ako siyang gisultian nga akong parents ang tag-iya sa maong yuta apan matud pa niya aduna daw gipakita nga SPA ang akong ig-agaw nga naghatag kaniya og katungod sa pagbaligya sa among yuta ug sa pagpirma sa Deed of Absolute. Ang akong ig-agaw di na nako makontak ug wa na sab magpakita. Unsay among buhaton aron sa pagbawi sa akong property? Daghang salamat. — Rosa

** *

Dear Rosa,

Kun ang SPA nga gipirmahan sa imong ginikanan igo lang naghatag og katungod sa imong ig-agaw sa pagprenda sa  property ug dili sa pagbaligya niini then makonsiderar nga void og dili valid ang Deed of Absolute Sale nga  gipirmahan sa imong paryente kay wa man siyay authority sa pagbaligya . Basi sa Article 1879 sa atong Civil Code, kini nagkanayon nga: “A special power to sell excludes the power to mortgage; and a special power to mortgage does not include the power to sell.” Buot ipasabot nga ang SPA alang sa pagprenda sa property wa maglakip sa pagbaligya usab sa property, kinahanglan nga adunay managlahi nga SPA alang sa pagbaligya ug sa pagprenda. Ang maayo ninyong buhaton karon mao ang pagpasaka og reklamo sa barangay diin mahimutang ang property batok sa imong ig-agaw ug sa buyer sa property. Kun di gyud mo mahusay sa barangay then modangop gyud mo sa korte pinaagi sa pagpasaka og  Civil action for the Annulment/Nullification of the Deed of Absolute Sale batok sa imong ig-agaw ug sa buyer niini, aron inyong mabawi ang maong property. Thank you and God Bless.

Atty. Divine

*  * *

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.