Serbisyong tinud-anay

Diri sa Barangay Apas, Cebu City, ang among kapitan nga si Virgil “Jingjing” Cabigon nagmugna og action team nga kada adlaw mosuroy sa lainlaing mga sityo aron tagdon ang mga reklamo sa katawhan.

Bisan gani og way reklamo basta ang team nga gipangulohan ni Rey Suelto makakita nga dunay angay nga trabahoon, ila gyud kining himoon, sama sa pagpangilmpyo sa mga kanal ug mga karsada.

Ingon niini ang angay himoon sab diha sa ubang kabarangayan nga magmugna sila og action team aron mosuroy sa lainlaing dapit ug moatiman sa mga angay’ng hatagan og pagtagad.

Ang grupo nila ni Rey Suelto nag-awhag sa katawhan nga pahibaw-on sila kon hain sa mga suga diha sa ilang dapit nga pundir ang bombilya kay ilang pangilisan.

Dunay mga sin, ug semento nga nadawat ang barangay nga gidonar gikan sa lainglaing mga kompaniya, ug gipanghatag usab kini niadtong mga nanginahanglan.

Mao ni ang rason nga makaingon ko nga kon iuktaba ang eleksyon sa barangay unya sa Disyembre sunod tuig, wa ko’y problema kay maayo man ang pagkadumala ni Kapitan Cabigon sa Barangay Apas.

Apan sa ubang barangay, sigurado ko nga daghang opisyal nga wa magtrabaho. Pero, bahala na ang mga magbabalaod nga maoy mohukom kon idayon ba ang eleksyon sa barangay karong Disyembre 5, o iuswag sa sunod tuig.

* * *

Nihit karon ang mga asukar, apan nasakpan nga nilibo ka sakong asukar ang anaa ra sa mga bodega sa mga Sugal Milling Company ug sa bodega sa mga dagkong magpapatigayon, nga wa nila ibaligya.

Sayonan ka nga sa pila ka bodega didto sa Mindanao nga gi-inspection sa Bureau of Customs ug sa Sugar Regulatory Board, miabot og 466,000 ka sakong asukar ang gitipigan ra.

Ngano kaha? Dili nato malikayan ang pagduda nga basin gihuwat nila nga mosaka pag-ayo ang prisyo sa asukar ug modako pag-ayo ang ilang ganansya.

Pero taym pa, gikareport nga apil ang mga softdrinks manufacturers nga apektado sa pagnihit sa asukar, ug wa na sila makapadayon sa ilang negosyo.

Miabot sa akong hunahuna nga dili ba, duna man sila’y gipasiatab nga produkto nga softdrinks nga “Zero sugar” kay haum kuno nga imnon sa mga diabetic?

Nganong maproblema man sila kon way sugar? Nagpasabot ba nga ang ilang softdrinks nga gipatuo nila nga “Zero sugar” gibutangan diay gihapon og asukar? Unsa man ni, pagpangilad?

Ang softdrinks nga gipatuo nila nga “Zero sugar” apan tam-is ra gihapon, kana maoy himoa ninyo kay dili pa makahatag og sakit nga maka-diabetes.