EDITORYAL - Dili poster city

Sa wakas nakit-an ra gyud sa siyudad ang usa sa mga nakapahugaw sa talan-awon sa kadalanan sa siyudad, kining daghan kaayong mga posters sa nagkalainlaing kompanya ug produkto nga gipamilit diha sa mga poste ug bisan sa mga punoan sa kahoy ug mga paril.

Gawas nga hugaw kaayo tan-awon  ilabi na kun nangakuspaw na ug nangagisi ang uban niini nga ginama sa tarpaulins ug baga nga klase sa plastic dili basta basta mahilis ug makabara sab sa mga agianan sa tubig.

Maayo nga nakita kini ni Mayor Michael Rama kay dugay na kaayo kining gihimo sa mga nagkalainlaing mga kompanya. Hinuon, dili man mismo ang kompanya gyud maoy aktwal nga namilit niini kondili ang mga kontraktor nga ilang gisuholan.

Tingali mahimo kining buhaton gihapon aron pag-promote  sa umaabot nga mga events, bag-ong produkto, o mga pahibalo nga para sa kaayohan sa publiko.

Apan kinahanglan nga tagalan kini og pipila lang ka adlaw ug kinahanglang tangtangon dayon sa mga kontraktor ini og kapupos sa gihatag nga panahon.

Dili kini mahimong epektibo o higpit tahuron  kun walay ordinansang maglatid sa mga guidelines bahin niini, o bisan nalang direktiba gikan sa mayor mismo nga kinahanglang ipasunod niadtong buot magtaud  og posters. Kun duna man tingali guidelines, klaro kaayong wala kini ngipon kay wala man  motahod ang  mga manaod niini.

Ikaduha, mahimo kini makolektahan sa siyudad og buhis ug pabayron og penalties ang kontraktor nga mapakyas pagtangtang sa maong mga posters ini og kapupos sa tagal.

Duna gyuy mga lugar nga gitugot kun asa kini ipamilit, apan  maayo ra man  kaayong mamilit ning uban sa ilang posters unya dili man  nila sundon sa paghipos, pasagdan  ra man nga madunot maong hugaw na hinuon kaayong tan-awon.

Nindot man gud tan-awon ang aseras kun limpyo ug walay nagkawil-kawil nga mga posters ilabi na nga pagkakaron wala pa gyud gihapon mosanong ang mga utility companies sa paghipos anang ilang mga spaghetti wires.