Ipa-disinherit ang anak

Dear Atty. Divine,

Duna koy pangutana labot sa akong ipahimo nga Last Will and Testament. Duna koy tulo ka anak, ang duha pamilyado na, apan ang akong kamanghuran wa pa maminyo ug mao gyuy naghatag namo og problema. Wa siya’y trabaho ug nagsalig lang namo nga iyang mga ginikanan ug nagbisyo pa gyud.

Manghagis kun dili hatagan og kwarta ug iya lang ming hadlokon nga iya ming patyon kun dili mi mohatag sa iyang gusto. Plano namo karon nga magpahimo og Last Will and Testament ug dili gyud namo binlan og kabtangan kining among kamanghuran kay wa gyud siya’y respeto kanamo ug kanunay ming makuyawan niya ilabi na kun manghagis. Mamahimo ba namo siya nga I disinherit? Daghang Salamat. — Lina

* * *

Dear Lina,

Basi sa atong balaod, ang mga anak compulsory heirs sa iyang mga ginikanan busa dili siya mamahimong hikawan sa iyang bahin sa kabtangan, kana maoy general rule,  apan ang atong balaod, nagtugot sa mga ginikanan sa pag disinherit sa iyang anak basi sa mosunod nga grounds nga gilatid sa Article 919 of the Civil Code nga nagkanayon: “The following shall be sufficient causes for the disinheritance of children and descendants, legitimate as well as illegitimate: xxx 6) Maltreatment of the testator by word or deed, by the child or descendant; xxx”. Sa ato pa, kanang gibuhat nga pagmaltrato sa inyong anak diha kaninyo mamahimo kanang basihan sa inyong pag disinherit sa inyong anak.

Busa sa inyo unyang paghimo sa Last Will and Testament kinahanglan nga inyong ilakip sa pagbutang kun unsay rason nganong inyong tangtangan sa iyang katungod sa pag-inherit ang inyong anak nga kamanghuran.

Ikaw ug ang imong bana kinahanglan  nga mohimo og managlahi nga Last Will and Testament kay wa man itugot sa atong balaod ang Joint nga Last Will and Testament. Thank you and God Bless.  — Atty. Divine

* * *

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.