MIM matuod imahe sa Marcoses

Miklik gyod sa takilya ang true to life story movie: ‘Maid in Malacañang’ (MIM) nga sinulat ug gidirehian ni direktor Darryl Yap taliwala sa daghang pagdaot nga minugna sa mga anti-Marcos aron lamang mapugngan ang pagpakatap sa unsay kinatibuk-ang unod niining sineha.

Ultimong panawagan ni Bishop Gerardo Alminaza, nga i-boycott ang MIM, wala magsilbe. Kay sa tulo ka adlaw pa lang nga pagpasalida, mi-gross income na kinig P62.8M.      

Kadaghanan sa nakakita sa MIM, apil na mga Kakampink, mikomentong walay revisionism ang nahitabo sa kinatibuk-ang pelikula. Lunlon panghitabo ug unsay gibuhat sa mga Marcos uban sa mga maid ug ubang mga alagad sa palasyo sulod sa kataposang 72 oras nilang pag-estar sa wala pa sila mamiya, mao ray gipasundayag.

Hinuon, silang nakakita na, mitambag. Magdala kunog panyo. Kay puno sa luha, katawa, kalagot ug kaluoy ang mga eksena.  Sanglit, dinhi gipasunding ang tinuorayng imahe sa pamilyang Marcos. Ang ilang pagka mapinanggaon sa katawhan ug sa atong nasud. Diin maoy gipalabi ni anhing Pangulo Ferdinand E. Marcos (FEM), nga di baleg mahuboan sa iyang nahuptang gahom, basta wala lamay dugo sa Pilipino nga mausik-banaw sa Edsa Revolution.

Paglingkod ni Cory sa Malakanyang (1986), tanang mainstream media mipabor niya.  Busa, nakapatuyang iyang administrasiyon sa makanunayong pagdaot sa imahe sa pamilyang Marcos: kawatan, tikasan ug diktador kuno! Ug nagpadayon kini hangtod na-presidente iyang anak nga si Noynoy (2010-2016).

Busa, niadtong citizen nga wala pa matawo sa Martial Law ug sa 1986 People’s Power, hugaw na kaayo ang ilang pag-ila sa mga Marcos. Sanglit, bisag usa na lang ka maayong binuhatan ni FEM, wala gyoy napatik sa Philippine History.

Apan nahibulong batan-ong Pinklawan supporters nganong daghang nakadayeg sa mga Marcos kon daotan pa sila? Nakuriyoso-intriga sila.

Busa, nanan-aw sila sa MIM. Ug didto ilang nasayran ang tinuoray’ng imahe sa mga Marcos. Bulawan diay ang mga Marcos nga gilubong sa kanhi mga mainstream media sa lapok. Ug dili diay lapok nga maoy pirme gitudlo-gipatuo sa ilang eskuylahan.

Hinungdan, nga nag-pro Marcos na sila. Lakip mga pro-Cory, kinsa miapil pa niadtong People’s Power, nakat-on na pod pagmahal sa Marcoses. Ug mitug-an, gikumot sab ilang kasingkasing samtang nagtan-aw sa salida.