Kinahanglan ang eleksiyon sa barangay

Sa demokrasya, ang pagpili mao ang pinakasentro o pinakauyokan sa kabubut-on sa katawhan ug ang piniliay mao ang kahigayonan nga ang mga naglingkod na sa katungdanan masubli sa pagpili sa katawhan nga nakauyon sa ilang gihimo ug dili masubli kun wala na kini mauyoni.

Apan ang kabubut-on sa katawhan sa pagpili nabaliwala tungod sa kanunay nga pag-uswag sa Malakanyang ug Kongreso sa termino sa mga pinili nga opisyal sa barangay ug SK nga miresulta sa paglugway sa termino sa mga naglingkod nga opisyal.

Ang barangay ug SK eleksiyon nga gitakda unta niadtong Oktobre 2016. Una na kini nga giuswag sa pagka Oktobre tuig 2017 apan giuswag na usab kini sa pagka Mayo 2018. Kay tulo ra ka tuig ang termino sa mga opisyal sa barangay ug SK, mag-eleksiyon na pud unta niadtong Mayo ning tuiga apan giuswag kini sa Kongreso karong moabot Disyembre 5, 2022. Rason sa Kongreso sap ag uswag sa piniliay mao aron makadaginot ang gobyerno og P5.7 bilyones.

Karon ang Kongreso ug Malakanyang naglaraw na usab sa pag-uswag sa piniliay sa barangay ug SK aron makadaginot ang gobyerno og P8.4 bilyones nga mas maayong gamiton na lamang kuno sa Covid-19 response. Pero ang akong pangutana, unsaon man pagkadaginot sa gobiyerno kun i-uswag ang eleksiyon nga mag eleksiyon raman gihapon, gi-uswag lang. Mas modako pa man gani seguro ang gasto kun i-uswag ang eleksiyon tungod kay nagka mahal ang mga palaliton ug seguro ko nga maapil sa pagmahal ang mga palitonon nga gikinahanglan sa eleksiyon.

Sa laing bahin, nganong gastoon pa man ang P8.4 bilyones nga budget sa eleksiyon alang sa Covid-19 response sama sa bakuna nga gipa-expire man lang gani sa gobiyerno ang mobalor P5.1 bilyones nga bakuna?

Bisan gitugot sa Batakang Balaud ang pag-uswag sa Barangay ug SK eleksiyon apan ang paghimo niini sa kanunay dili maayo nga ehemplo.

Ang pagsige og uswag sa nahisgotang eleksiyon naghatag og ganti sa mga badlungon nga opisyal sa barangay ug SK ug nagbaliwala sa kabubut-on sa katawhan sa pagpili.