Rogate Ergo

Tuig 1995 nikuyog ko atong Lodegario Rollan ug kadtong Biju usa ka Indian Religious. Naghimo sila og Vocation Campaign kaniadto didto sa Catmon.

Pila may estorya ni apply ko didto. Kuyog ako sila Rodolfo Cabigon, Fernando Butaslac ug si Agbayani Molde.

Lisud kaayo kaniadto bugtong 12G nga jeepney ang saksi sa akong mga kasinatian.

Karong tuig 2022 nibalik ko didto. Dala na nako ang mga sakristan nga buot mopuyo didto sa makadayot. Ang akogn tumong mao lamang at least ang pag-orient kanila kun unsay kinabuhi sa seminaryo.

Mingaw pa man hinuon didto mao nga mas nindot aron daghan sila og masayran kalabot niini.

Ning paagiha mamahimong daw mas matugkad nila ang kalainan sa kinabuhing makahuloganon.

ROGATE ERGO busa pag-ampo kini tungod kay ang gikinahanglan ning panahona mao man ang mga maayong magbalantay sumala sa kasingkasing sa atong Ginoo.

Mga magbalantay nga nga naghunahuna sa kaluwasan sa panon. Mga Magbalantay kang kansang kinabuhi balaanon ug makiapadasig.

Ning panahon sa dakong krisis ang pagsaksi makatabang aron mahibalik sa daang han-ay subay sa kabubut-on nga Diosnon.

Akong mga panghinaut nga pinaagi ning maong mga kasinatian daghanan sa mga kabatan-onan ang mahigmata sa ilang misyon ingon nga binunyagan.

Bisan asa sila dapita mahiadto unta makita nila ang Ginoo. Sama nako mas nakita ko ang presensiya sa Dios sa mga higayon nga ako nagkinahanglan gyud kaayo.