Bag-ong usa ka libo hasol

Lisod pangitaon ang kuwarta ilabi na kon ikaw tigulang na. Apan may mga kugihan, kinsa bisan senior na, nangita gihapog kapanginabuhian. Sama sa pagpanindag isda, ginamos ug uban pa. Manimaho intawong langsa o duga sa tinabal ang mga sinina ug ang gibakos nga panaptong sudlanan sa ilang halin.

Sa mga merkado publiko dili malikayan nga magum-ot ug mahugaw-basa ang mga papel de bankong gigamit sa pagbinayranay ug pagsinukliay. Usahay, may mahulog sa kanal, diin ibulad lang sa adlaw, pagka uga, dawaton gihapon sa tanang tindahan.

Nagmatuod, nga papel man ang kuwartang gigamit nato sukad niadtong wala pa kita matawo ug hangtod karon nga wanggits na, ang kalidad niini lig-on ug dili daling molubad. Gani, bisag kumoton, mobalik rag kabukhad-tuskig.

Apan makapasubo! Ang Banko Sentral sa Pilipinas (BSP), sugod sa miaging Abril 18, 2022 mipagawas og mga bag-ong P1,000-bill nga polymer o hinimo sa plastik.

Nga matud pa ni kanhi Governor Benjamin Diokno mas lig-on kay sa naandang papel de banko ug dali pang malimpiyohan og disinfectant nga pang anti-COVID 19 ug dili gyod kuno madaot.

Sa pasiunang pahibalo sa BSP, gidili ang pagpilo, paghugawhugaw ning maong salaping plastik. Hinunoa, giawhag ang naghupot nga limpiyohan kinig diyotayng tubig ug pahiran og ugang nuog.

Ingkasog makum-ot ang kuwarta, mapitlag hugaw, magisi o uban pang matang sa kadaot, dili na kini madawat. Unya, pabayron pag P20K ang naggunit niini kon mamatud-an nga iyang tinuyoan ang paghimo sa unsay gidili.

Gisaway sa kinabag-an kining sobra ka mangtas nga balaod. Lalim bay, pait kaayo ang pagpangkaskas og kuwarta karong panahona. Gipun-an pa og laing kapait sa BSP. Kay bisag masulod ra sa relos ang pinilong P1K, kinahanglang magdala ka nag rektanggulo ug gahing sudlanan o handbag aron dili kini malum-it!

Imbes, adunay sekretong katagoan ang kuwarta, i-display na hinuon kini sa mga isnatser ug kawatan. Kay dili na man kini masulod sa bolsa! Pabor sa mga daotang elemento kining bag-ong P1K nga giimprinta sa BSP. Pero nagdalag dugang kalbariyo sa tanang katawhan.

Ang daang 1K hinimo sa papel. Kon itandang sa kainit motuskig. Pero ang bag-ong ginama sa plastik, malanay!  Maayo bang ipadayon? Dili ba, super hasol?