Midnight biddings ng DPWH sa Mt. Province, nangangamoy!
Noong nakaraang Hunyo 28-29, nagkaroon ng “midnight biddings” sa Mountain Province sa ilalim ng DPWH-CAR at umaalingasaw na ito ngayon. Umabot sa P1,832,076,440.46 ang infrastructure projects na napakadaling naipa-bid. Maraming naghihinala kung bakit napakabilis ng isinagawang bidding.
May hokus-pokus umano kaya napasakamay ng mga napiling contractors ang 11 rocknetting slope protection projects sa Mountain Province.
Dahil sa pag-alingasaw, hiniling ni anti-corruption activist Juniper Dominguez ng Sabangan, Mountain Province na magkaroon ng imbestigasyon sa napakabilis na bidding process.
Ayon kay Dominguez, una na raw kasing “naayos” ng mga contractor ang mga opisyales ng DPWH-CAR. Ayon pa sa corruption activist, mayroon umanong “fixing” na nangyari kaya mabilis ang bidding process.
Sa totoo lang, hindi naman masama ang mabilis na bidding process kung ang proyektong sangkot ay magdudulot ng kapakinabangan sa mga taga-Mountain Province. Subalit lumalabas na walang mapapakinabang dito ang mga residente.
Maraming proyekto ang dapat unahin at hindi ang rocknetting projects na nagkakahalaga ng halos P2 bilyon. Ang mga proyekto sana na makatutulong sa mga magsasaka ng Mountain province ang dapat iprayoridad.
* * *
Para sa suhestiyon: art.dumlao@gmail.com
- Latest
