Abuso ang rason

Laing taytayan didto sa Bohol nga nahimutang sa usa ka barangay sa lungsod sa Catigbian, nahugno na usab kaniadtong Huwebes.

Ikaduha na kining taytayan nga nahugno, ug atol sa pagkahugno sa maong duha ka tulay, pareho gyud nga nahitabo nga dunay miagi nga dump truck nga kargado og bug-at kaayo nga mga balas ug graba.

Nagtuo ko nga nahugno ang maong mga tulay kay ang miagi nga dump truck, nagkarga og subra sa gilatid nga gibug-aton nga masugakod sa maong taytayan.

Ang nahugno nga tulay sa Catigbian, 20-Ton capacity lang, apan matud sa mga eksperto nga ang usa ka dump truck mokarga og 16 cubic nga bas ug graba.

Ang gibug-aton kuno sa matag cubic nga bas ug graba moabot og mga 1.6 Ton. Unya pun-an pa sa gibug-aton sa dump truck, sa ato pa pwerteng bug-ata ug subra na sa capacity sa tulay.

Angay nga ang kadagkoan sa provincial government sa Bohol modemanda sa tag-iya sa maong truck nga mobayad sa pagkaguba sa tulay, kon masuta nga subra ang iyang gibug-aton.

Unya, ang mga mayor ug ang kagamhanang provincial, kinahanglang magmugna sila’g pamaagi nga malikayan na nga adunay mga sakyanan nga magkarga og bug-at nga kargamento nga moagi sa mga tulay nga gagmay ra ang kapasidad.

Kon dili kamo makahimo’g paagi pagpanalipod sa atong mga tulay, mahurot ang atong mga tulay sa pagkaguba, ug ang pasanginlan mao nga gubaon ang taytayan, bisan og ang tinuod, over weight diay ang miagi.

Nakompleto na gyud sa pagpangibot ang mga dagkong kahoy nga gipangtanom taliwala sa Osmeña Boulevard gikan sa eskina P. del Rosario Street paingon na sa Fuente Osmeña.

Isunod nila ang paingon na usab sa Kapitolyo. Ang sunod nilang buhaton mao ang pagbuldos sa center-island nga hinimo sa semento, aron anha himoa ang exclusive lane nga para sa Bus Rapid Transit.

Nindot kaayo sa mga lapad nga karsada, pero sa mga gagmay’ng karsada, sama sa Escario Street siguradong traffic kay “four lanes” ra man ug ang duha ka lanes sa tunga gamiton man para sa BRT.

Bisan pa og way mga bus nga moagi sa BRT exclusive lanes, dili kini maagian sa mga ordinaryong sakyanan kay butangan man nila og barriers.

Kinahanglang estriktohon na gyud pag-ayo nga wa nay tugotan nga maka-parking nga sakyanan daplin sa mga karsada nga adunay BRT lanes.

Matud pa sa mga proponent sa BRT, mopaspas kuno ang biyahe, aw tan-awon nato. Basin og kamo’y maapektohan ha ug mohilak mo?