Politika wala na, gipatigbabaw ang panaghiusa

"Human naman ang politika niagi naman ang eleksyon, I will be supporting sa programs, sa projects nga makatabang sa Sugbo ug mga Sugboanon.”

Mao kini ang gipadayag ni Cebu Vice Governor Hilario Davide III sa Executive Order number 16 ni Governor Gwen Garcia nga mas napalig-on human giumol isip provincial ordinance sa Sugbo.

Si Davide ang presiding officer sa Sanguniang Panlalawigan nga nagkahiusa sa pag-aprobar sa ordinansa nga gipangamahanan ni Board Member Borgonia nga naghatag og ngipon sa optional nga pagsol-ob og face mask sa mga dapit nga bukas og maglusot lusot ra ang hangin.

Gawas sa iyang pagka bise gobernador o presiding officer sa Provincial Board, usa usab ka abogado si Davide kinsa anak ni kanhi Chief Justice Hilario Davide busa aduna kiniy "K" o Katungod sa paghimbis sa mga lakang nga ipatuman sa buhatan sa gubernador kong aduna bay legal nga basehan o wala.

Gisuportahan sa bise gobernador ang executive order ni Garcia nga gihulagway niini nga adunay legal basis pinasikad usab sa Local Government Code of the Philippines diin gipanghimug-atan ang lokal nga otonomiya sa probinsya sa Sugbo.

Dili tungod kay nagsunod sunod lang si Davide kang Garcia busa nisanong lang siya sa kamandoan niini nga gipanday pa gyud nga balaod, apan tataw nga walay nalapas nga balaod ang gihimo sa gubernador.

Kini nunot sa padayong pag gukod sa national government agency sa gihimong lakang ni Garcia nga hingpit nang nahimong balaod ug gikinahanglan nga mopatigbabaw.

Tungod kay balaod gikinahanglan kini nga mapatuman kay mao man kini ang mopatigbabaw sa bisan unsa pa nga palisiya sa IAFT.

Hinuon mahimo man kuno nga resolbahon sa korte ang isyu apan ang DILG ang mihimo sa lakang kay sila ang nikisikisi.

Managlahi og political affiliation si Garcia ug Davide apan sa isyu sa optional wearing of facemask nagkahiusa sila tungod ug alang sa mga Sugboanon.

Mosamot ka "S" Suya ang taga Manila kay bisan unsaon nila og uyog ang Sugbo misamot man hinoon ka lig-on nga andam mosungag sa mga higante didto sa kaulohan.

Probinsiya man ang Sugbo apan dili masayon sayon sa pagpaluhod nga maoy gusto sa mga taga Manila diin adunay gipagawas nga pamahayag ang Justice secretary nga mas maayong dili diretsohon og bangga ang IATF kay mahimo ra nga pahibaw-on daan sa mga lakang kay basin himong pilot test ang Cebu sa dili pag sol-ob of facemask.

Maayo man ang sugyot pero nganong dili man ang taga Manila ang moanhi sa Sugbo ug makigsabot sa LGU? Hinumduman nila nga pinili sa mga tawo ang mga opisyal nga naglingkod itandi sa implementor nga tinudlo ra pero kong makalihok murag kinsa.