Synodality

Kini ang gipangindahay sa tanang mga sakop sa atong simbahan labina gyud sa atong Santo Papa Francisco. Tumong niini ang pagpatuman niini sa tuig 2023. Damgo nga mahatagan og katumanan ang diwa sa Konsilyo sa Segundo Vaticano. Sa pagkakaron gihimo pa ang Interdiocesan consultation ug kini mao man ang ilang pagadad-on ngadto sa Roma.

Kini mao ang sukaranan sa pagahimoong pastoral program sa atong Katolikong Simbahan ning bag-ong kapanahonan. Ning panahona angayan natong i consider kining mosunod:

Presensiya sa Simbahan ngadto sa iyang mga anak. Nanimaho ba siya sa baho sa iyang mga karnero? nahimo ba siyang kuyog nila sa panahon sa dakong pangihanglan. Nahimo ba kaha siyang estranghero kanila nga nagkinahanglan sa iyang presensiya?

Pakighiusa labina sa mga panahon nga kinahanglang siya motingog on behalf sa tingog sa iyang mga anak. Pakighiusa sa iyang mga katawhan labina sa mga panahon nga sila mawad-an og paglaum. pakighiusa sa ilang kalisdanan. pakighiusa diha sa ilang mga kasakitan.

Pangalagad. Ang pagtuo magpabiling buhi kun kini atong ipakita sa konkretong mga buhat. Ang mga lihok sulbad sa mga suliran mahinungdanon kay sa bisan unsang hataas ug puno sa bulak nga mga diskurso. Kini ang makapahimo natong relevant ning atong kapanahonan karon.

Unta ning panahon nato karon mamahimong magmabungahon unta kining maong panagtigum ug dili lang mamahimong kabahin sa nagtiundok nga mga dokumento nga hangtud karon wala pa gyud gihapon ma implement. Ang tingog sa Espiritu Santo ato untang madungog ang iyang kainit mao unta ang modasig kanatong tanan. Hinaut pa unta.