Pagmaneho risgo

Ang karsada para sa tanan. Apan may iyaiyang dapit nga agian alang sa mga sakyanan, ug katawhan. Hinungdan, may bus lanes, bike lanes, pedestrian lanes ug uban pa. Kini gituyo pagbahig sa hingtungdang ahensiya sa gobiyerno ubos sa pagpanimon sa Departmnent of Transportation aron malikayan ang dugoong linigsanay ug binanggaay sa mga gagmay ug dagkong behikulo, diin usahay mokalas og mga kinabuhi sa tawo.

Niadtong Hunyo 1, sa may eskina Cabancalan, Mandaue City ug Talamban, Cebu City, maayong pagkapigsat ang ulo sa usa ka nagmotorsiklo human malatayi sa garbage truck nga gipanag-iya sa Department of Public Services (DPS) sa siyudad sa Sugbo.

Matud pa, ang naasoy'ng nagmotorsiklo, ingon sa nagdali sanglit alas 6:00 sa buntag na pasado, oras nga tingpadulong sa trabahoan, tindahan o ubang dapit nga adtoan sa usa'g-usa. Diin halos tanan, ingon sa nakiglumba sa rush hours.

Hinungdan, nga dihang miobertik siya sa usa ka tawong nagbiseklita, nasaghiran niya kini nga maoy nakapalupad nilang duha sa nagkalainlaing direksiyon. Ang nagbisikelita napunta sa daplin, samtang ang nagmotor didto motugpa sa karsada, diin wala na makahatag og igong higayon sa nagsunod nga garbage truck, paglikay aron ang nahagbang nagmotorsiklo dili maligsan.

Sa miaging Hunyo 3, sa South Road Properties tunnel, samtang mabinantayong nadrayeb si Gilbert Catubig sa iyang kotse, kalit lang nakurat dihang gidumbol sa usa ka SUV ang iyang likod. Unya, may nadunggan pang laing milagubo. Diay, lima ka sakyanan ang nagkarambola sa maong hugna, diin ang sinugdanan mao ang gimanehong trailer truck sa usa ka Jayson Alima-lima nga kuno nawad-ag brake.

Pastilan, luyo sa pagkamainampingon ni Gilbert, nangaangin gihapon silang tanan sa maong disgrasiya. Pulos makagastog salapi, panahon ug kahago diha sa pagpaayo sa ilang nangagubang sakyanan.

Kini nagmatuod lang, nga risgo tinuoray ang pagmaneho. Kay bisan ikaw nag-amping sa tanang panahon, sama sa nahitabo nako (2018), nga naghunong na sa may traffic lights sa corner Sanciangko-Pelaez Steets samtang naghuwat sa Go-signal, takulahaw lang gisungag sa karaang PUJ ang likod sa among sakyanan. Haskang malasa!

Mga higalang drayber, may driving tips nga sa matag karon ug unya, ipublikar dinhi sa atong The Freeman Banat News tabloid for safety driving. Ato ning sundon, Bay!