Pakapin ang pumpboat

Taliwala sa padayon nga pagsaka sa presyo sa gasolina, pipila ka mga mananagat ang mibaligya na lang sa ilang  mga pumpboat tungod kay mas mahal na ang pagpadagan ug pagmentinar niini.  Dili mahubit sa pulong ang kapait sa  epekto sa padayon’g pagmahal sa gasolina ngadto sa panginabuhian sa katawhan.  Hayan moabot ang panahon nga  aduna kita’y mabasa nga advertisement sa mga gasoline station nga nagkanayon, “Adunay pakapin nga pumpboat matag  patubil og 10 litros nga gasolina.”  Fezteleern!

 Maglisod na pagsurikbot

Gikahinangop sa Police Regional Office-7 (PRO-7) ang “No CCTV, No Business Permit” policy nga buot ipatuman sa

DILG sa mga lokal nga kagamhanan kay makadugang kini sa seguridad ug proteksyon sa tindahan ug sa mamalitay.

Makapahinumdum ang maong polisiya sa estorya sa apohan nga nagpasiatab nga sa kanhiay’ng panahon, sa kantidad

nga 50 pesos, magbaguod na siya sa iyang kinompra, apan karon mabitbit na lang sa usa ka kamot ang iyang

mapalit.  Sa pagpangutana sa iyang apo kon kamahal ba sa presyo sa palaliton ang hinungdan, mitubag ang apohan

nga, “Malisod na karon Apo, kay naa na’y CCTV sa tindahan. Maglisod na ko’g surikbot sa mga tinda”. 

Pagkatoytoy!

 Oportunidad sa pagpahimulos

Gitugtan na sa Civil Service Commission ang flexible work arrangements sa mga buhatan sa gobiyerno ug mahimo na

kining ipatuman sugod sa Hunyo 15.  Ang bag-ong polisiya gitumong nga mapa-uswag ang balanse sa kinabuhi ug

trabaho ingon man makadugang sa productivity sa mga empleyado. Labing mahinungdanon sa pagpangalagad mao ang

pagpadangat sa tukma ug tiunay nga serbisyo sa katawhan sa walay paglangan-langan.  Ginaingon baya nga “Kon ang

katuyo-an sa tawo sa iyang pagpanarbaho mao lamang ang bahandi ug gahum, bisan ang labing ta-as nga matang sa

serbisyo publiko gilantaw na kanunay nga oportunidad”. Madahaan!

 Suliran sa kagutom

Nasuta sa gipahigayon nga survey sa SWS niadtong Abril 2022, nga adunay 3.1 milyon ka pamilya ang nakasinati og

kagutom sa unang quarter sa tuig.  Dili maanindot ang kahimtang ug kaugmaon sa usa ka nasud kon daghan sa iyang

katawhan ang gigutom.  Ang gutom nga katawhan dili na maminaw sa rason, dili na magtagad sa kaangayan ug dili na

madani sa mga pag-ampo.  Ang tahas ug katuyoan sa usa ka nasud dili mahingpit kon aduna pa kini mga lumolupyo

nga nangatulog bisan gutom.  Sugyot sa akong amigo,”Ipadayon ang “feeding program”.  Baya no!

Atribido ang dilg

Gipahinumduman sa DILG ang mga bag-ong napili nga mga opisyal sa pag-file sa ilang Statement of Contributions

and Expenses (SOCE) aron dili malangang ang ilang pag-asumir sa katungdanan.  Dugang pa sa DILG, yano lang ang

ilang kamanduan: “Walay SOCE, walay oath-taking”.  Daw nagpasiatab na usab ang DILG ni’ng maong pamahayag. 

Responsibilidad sa COMELEC, ug dili sa DILG, ang paghikutar sa pag-file sa SOCE.  Ni’ng kahimtanga, nahisama ang

DILG sa mga ugangan nga mohatag gayud sa ilang tambag o opinion mahitungod sa kaminyoon bisan dili nato  pangayoon.  Pagka-atribido!