Benepisaryo (Last Part)

Sa Mayo 10, 2010 nga nasudnon ug lokal nga eleksiyon nagpapili sa pagka mayor sa Kauswagan, Lanao del Norte sila si Rommel C. Arnado, Linog C. Balua ug Casan M. Maquiling. Si Linog Balua miduso og diskuwalipikasyon nga kaso batok ni Rommel Arnado tungod kay kini dual citizen (Filipino ug Amerikano). Iyang gipakanselar ang sertipikasyon sa kandidatora ni Arnado.

Midaug si Arnado sa eleksiyon apan gianular sa comelec ang iyang proklamasyon sa pagka mayor human gikanselar sa Comelec First Division ang iyang sertipiyiko sa pagka kandidato. Gimando sa Comelec ang pagpuli sa bise mayor nga mayor basi sa lagda sa succession. Miduso og mosyon alang sa rekonsiderasyon si Arnado ngadto sa Comelec en banc o kinatibok-ang sakop sa Comelec.

Si Casan Maquiling kinsa maoy nakakuha sa ikaduha nga puwesto sa eleksiyon sa pagka mayor miinterbinar usab ug mi-question sa hukom sa Comelec. Ang Comelec en banc mideklarar ni Arnado nga kuwalipikado sa pagpapili pagka mayor.

Miduso si Maquiling og petiton sa hukmanan nga nag question sa hukom sa Comelec en banc nga nagdeklarar ni Arnado nga kuwalipikado sa pagpapili pagka mayor bisan pa man sa padayon nining paggamit sa iyang pasaporte isip usa ka American citizen. Gipangayo usab niya sa Korte Suprema nga ideklarar siya nga mananaug sa 2010 nga eleksiyon.

Gidiskuwalipay sa Korte Suprema ang sertipiyiko sa kandidatora ni Arnado. Tungod niini, gideklarar nga mananaug sa eleksiyon si Maquiling kay siya ang nakakuha sa pinakadaghan nga boto sa mga kandidato pagka mayor. Wala giapil sa pag-ihap ang daghang boto nga nakuha ni Arnado tungod kay dili siya kuwalipikado.

Ang Korte Suprema miingon nga ang boto nga napunta ngadto sa dili kuwalipikado nga kandidato dili mahimong ikonsiderar nga maoy magdeterminar sa modaug sa eleksiyon. Ang hukmanan midugang sa pag-ingon nga bisan dili apilon sa pag-ihap ang boto nga nakuha sa diskuwalipikado, girespito ra gihapon ang kabobot-on sa katawhan. Ang boto nga nakuha sa dili kuwalipikado dili lamang kini ang ang naglangkob sa kinatibok-ang kabobot-on o tingog sa katawhan. Ang boto nga nakuha sa kuwalipikado nga kandidato kabahin usab sa tingog sa katawhan nga angay usab nga respitohan.

Ang kadaugan sa eleksiyon dili usa ka magic formula nga himoong kasangkapan aron baliwalaon lang ang gilagda sa balaud nga kuwalipikasyon. Dinhi mahimong Presidente si Leni Robredo.

Kun mahitabo kini, makasabot kaha ang mga tawo nga mibotar ni Bongbong Marcos? Dili kaha magkaguliyang ang nasud? Bahala na ang Korte Suprema niini.