Home visit

Nahimo na nakong batasan matag gabi inga mosuroy gyud ko sa mga kabalayan. Sulod sa maong panimalay among ampoon ang santos nga rosary.

Dunay pagpamalandong ginamit ang pagsaba sa ebanghelyo alang sa sunod Dominggo. Dayon sab-ongan dayon sila sa eskapularyo sa mahal nga Birhen sa Carmen.

Kini ang akong usual routine matag gabii. Nanghinaut ako nga pinaagi niini maduol sila sa Birhen ug labaw sa tanan maduol sila sa Ginoo ingon man sa Parokya.

Kun buot hunahunaon kapoy baya gyud ning maong buhat apan tinguha ko nga dunay hands-on nga bahin labina kun maghisgot kita og ministerial apostolate. Nagpasabot kini nga mahinungdanon silang bahin sa usa ka lawas nga mao ang Parokya ug ang simbahan sa kinatibuk-an.

Alang sa uban daw simplistic ra ang approach apan nakita nako sa kaulahian nga daghanan nato ang kinahanglang mobalik gyud sa basic labina gyud diha sa atong pagsabot sa pagtuo.

Sa atong pagka komplikado kalabot niini gumikan sa atong tinguha nga atong mautingkay ang tanang misteryo, imbis makab-ot nato ang mas halawom nga pagsabot nahimong mas ungkag naman ug salingkapaw ang atong pagbansay niini.

Subo palandungon apan mao ang tinuod. Wala nako isipa ang akong kaugalingon nga kugihan.

Apan sa akong pangedaron karon nakita ko ang kaamgohan nga mahinungdanon gyud kaayo ang family immersion ug evangelization.

Basin na lang nga diha sa kagabhion matisok nato ang binhi sa pagtuo nga hinay hinay namatay gumikan sa suliran, kalisdanan, ug kawalay kapaingnan. Human sa pag-ampo anaa ang talad kan-anan diin anaa didto ang pagpangumostahay sa usag usa.

Ning tungora mas real alang kanimo ang suliran nga ilang gipas-an.