Palusot sa prisohan

Giangkon sa kapolisan sa dakbayan sa Sugbo nga dakong hagit sa ilang kampanya batok sa illegal nga drugas ang operasyon sa mga durugista gikan sa Cebu City Jail. Matud ni Lt. Col. Wilbert Parilla, deputy city director for operations sa Cebu City Police Office, nga sagad sa mga durugista nga ilang nadakpan mitudlo sa City Jail nga maoy ilang tinubdan. Ang pagtugot sa mga priso nga makahupot og kahimanan sa kumunikasyon sama sa cellphone naghatag nila og higayon nga makapadayon sa ilang illegal nga operasyon.

Pinaagi sa cellphone makahimo gihapon sa pagpadagan sa illegal nga negosyo ang mga durugista bisan tua na sa bilangoan. Sayon ra nilang matawag ang ilang mga sakop nga pabilin pang gawasnon aron maoy mohimo sa ilang mga transaksiyon.

Sigun ni Parilla mao ni dako nilang hagit karon sa kampanya sa illegal nga drugas, unsaon nga masanta ang kumunikasyon sa mga durugista gikan sa prisohan. Ang kapolisan miingon nga lisud kunong ilhon kinsa sa mga priso ang nalambigit tungod kay pulos alyas ray nailhan sa mga dinakpan.

Lisud tuohan ang sulti sa kapolisan dili ba? Kun seryosohon nila og imbistigar siguradong ilang mailhan. Imposible nga wala makaila ang mga dinakpan kinsa ang nagsugo nila kun tinuod man ugaling kay way tawo nga magpataka og panugo, labi pa sa mga negosyo nga sama sa illegal nga drugas, kun dili sila kaila ug wala siyay pagsalig.

Dili sab layo ang posibilidad nga gigamit lang sa mga nadakpang durugista nga lansis ang City Jail apan ang tinuod way nagsugo nila. Kumbinsido hinuon ko nga hangud ron wala pa gyud masulbad ang paglusot og mga kontrabando sama sa cellphone, hinagiban, drugas ug uban pa sulod sa prisohan.

Pruweba niini mao ang mga illegal nga mga butang nga masakmit mataghigayon nga dunay greyhound operation nga himoon ang mga tinugyanan. Lisud ni nga masulbad tungod kay nahimo na ning negosyo sa ubang mga tinugyanan sa bilangoan.

Mga gwardiya ug posibling lakip pa ang mga opisyal mismo sa prisohan maoy nalambigit sa palusot sa mga gadgets ug ubang kontrabando. Sa kahigpit sa siguridad sa prisohan, lakip gani ang pribadong parte sa lawas sa babaye ilang bukikion, dili makalusot ang kontrabando og way pagtugot sa mga tinugyanan sa prisohan.