Ukraine-Russia war, delikado

Wala pa gani makabangon pagtarong ang atong ekonomiya tungod sa pandemiya, ang nasinating kalisod sa katawhan napun-an na sab og lain. Kini gumikan sa miulbong dakong gubat didto sa Ukraine human sulonga sa Russia. Ang presyo sa gasolina, krudo ug petrolyo sagunsong misaka. Ug samtang magpadayon ang gubat, magsige gyod pagtaas ang mga presyo niini. Nga otomatik mopamahal pod pag-ayo sa tanang palitonon nga atong gikinahanglan kada adlaw.

Kaluoy kaha sa mga construction worker ug ubang mga ordinaryong mamumuo nga nagsuweldo lamang og tag-P400 ang adlaw.

Paigo pa kaha kini sa pamilyang adunay lima ka buok anak nga pakan-on?

Ang mga senior citizen kang kansang binulang pensiyon P8K ra. Wala nay anak o apo nga masangpit. Unya adunay tambal nga gimintin.  May ikapalit pa kaha silag pagkaon sa matag adlaw?

Ning panagkombati sa Ukraine ug Russia, makaluluoy kitang pobreng nasud. Delikado kaayo, nga sa ilang panag-ilogay sa gahom, kitang ania sa ubos matumban o mapiksan. May ikasagang kaha kita, ingkasog may aso sa nuclear bomb nga masaag sa atong nasod sa ila unya, simbako, nga pagbinombahay?

Sa West Philippine Sea controversy pa lang, gipalabi ni Presidente Rodrigo Roa Duterte nga makighigala ang atong nasod sa Tsina ug Russia, nila: ni China President Xi Jinping ug Russia President Vladimir Putin. Nungkang, makig-away sa berdugong Tsina.

Gamhanan ang maong mga nasud. Wala ra kita sa kumingking kon puwersa sa military ang hisgotan. Gani, gihatagan pa man ta nilag mga barko, ayroplano ug helikopter nga iggugubat, timaan nga naghinobra ang ilang kaadunahan. Busa, husto ra ang gibuhat ni Duterte.

Hinuon, ning pag-alintabo sa dakong gubat didto sa Ukraine human sulonga sa Russia angay kitang maalarma. Wala man tuod mangayog ayuda-militar ang Russia sa Pilipinas, pero kinaiya baya natong Pinoy ang kaantigo mohunahuna’g unsay utang kabubut-on? Makabalibad pa kaha kita oras nga mamarayeg si Putin? Alang nako, usa ray kinaepektibohang tabang nga atong matunol – ang kinasingkasing pag-ampo sa Kahitas-an nga unta magkauli ang maayong relasyon nila ni Putin ug ni Ukraine President Volodymyr Zelenskyy.

Buwahan, mahunong na kining gubata samtang wala pa makakatay sa nagkalainlaing kanasoran nga delikadog mohantong-sangko ngadto sa World War III. Unta, dili kini mahitabo!