EDITORYAL - Keyboard “political analysts” naghitak

Gibahaan karon og mga post ang social media ilabi na ang Facebook og mga analysis sa mga tawo kabahin sa mga panghitabo karon didto sa Ukraine nga gisulong sa nasud sa Russia. Apan nindot unta kaayo basahon kun ang nag-post nakahibalo gyud sa lintunganay sa maong kagubot.

Dugangan pa nga gikumparar nila ang mga foreign policies sa mga kandidato sa pagka-presidente karon sa nasud ug gihimoan pa og mga “memes” aron nindot ang presentasyon. Sa mga nakahibalo, nakasubay ug naghago og research sa mga panghitabo didto , basura lang kining mga posts ilabi na sa dihang gikumparar ang Pilipinas sa Ukraine bahin sa pakig-alyansa ngadto sa NATO o sa Amerika.

Una sa tanan, ang Ukraine dili kaalyado sa US o sa NATO mao nga dili basta-basta makapadala og tropa didto sa Ukraine aron sila tabangan.

Nagpasabot nga dili obligado ang NATO ug US pagpadala og tropa didto tungod kay wala silay military alliance sa Ukraine.

Apan mitabang gihapon ang NATO ug US pinaagi sa pagpadala og dugang mga armas ug bala ug mipahamtang og economic sanctions batok sa Russia.

Dili sama sa Pilipinas ang Ukraine, kay duna kini US-PHL  Mutual Defense Treaty ug Enhanced Defense Cooperation Agreement ug gikonsiderar sab kini nga Non-NATO Ally sama sa Japan, South Korea ug Australia.

Hinuon dunay malisya ning ubang mga posts kay ang ila lang gyud mao ang pagtuboy sa ilang mga kandidato.

Una sa tanan, ang pagkahimong political analysts ug eksperto sa geopolitics dili makuha sa usa lang kagabii.

Kinahanglang nasuhito sa lokasyon o geograpiya (mapa), politikang nagtuyok sa nahisgotang mga nasud ug rehiyon, ang relihiyon sa mga tawo sa lugar, ekonomiya, kabutang sa populasyon niini ug ang ilang hiniusang tingog bahin sa mga isyu ug labaw sa tanan ilang kasaysayan. Magbantay gyud aning naghitak nga mga “keyboard political analysts” kay duna ra ba sab uban nga motuo ani nila ilabi na kun parehas sila’g gidapigang kandidato.

Ang uban aning mga posts duna pa gyuy panapos nga tudling nga dalang panghagit, pangaway ug pagpanghulga sa mga tawong mas dunay kahibalo kay nila ug sa mga dili makombinsir sa ilang posts.

Husto ang panultihong “little knowledge is dangerous.”