Unsaon pagpilde si Marcos Jr.
May talagsaong sugyot ang Sugboanong kanhi senador nga si Serge Osmeña sa mga nanagan pagka presidente sa Mayo 9, 2022: Labing epektibo nga paagi sa pagpahagsa sa popularidad ni kanhi senador Ferdinand Marcos Jr. mao ang pag-atake sa iyang amahan nga si anhing Ferdinand Marcos Sr.
Matud ni Osmeña nilampos ang kampo ni Marcos Jr. sa paghilo sa Facebook, YouTube ug ubang social media platforms sa niaging dul-an sa dekada sa sayop nga kasayuran nga nipahumot sa diktadura sa iyang amahan.
* * *
Nipasabot si Osmeña sa ABS-CBN News Channel nga nailad sa fake news ni Marcos Jr. ang mga nagpangedaron og 55 paubos. Kay wa silay direktang kasinatian sa martial law. Ug ang mga eskuylahan wa motudlo sa kalapad sa pinatyanay ug kinawatay sa rehimeng Marcos.
Mao ni hinungdan, nibutyag si Osmeña, nga ang positibong imahe ni Marcos Sr. nga 20% ra dihang gipalayas sa Malakanyang niadtong 1986 nisulbong sa 73% sa 2022. Matud niya si Marcos Jr., nga way nahimo sa iyang mga posisyon sa gobyerno, igo lang nisakay sa sayop nga pagtuo nga paraiso ang Pilipinas atol sa diktadura.
* * *
Nakugang si Osmeña sa mga sentimento sa mga dumadapig ni Marcos nga gipaapil sa ilang focused group discussion (FGD):
• Si Marcos Jr. maoy makasunod ni Marcos Sr. nga nakahimo sa Pilipinas nga tigreng ekonomiya sa Asya;
• Dato ang Pilipinas ubos sa pagduma ni Marcos Sr. ug ubos ang presyo sa mga palaliton; ug
• Ubos ni Marcos Sr., numero uno sa export ang Pilipinas, ikaduhang labing dato sa Asya ug daghan ang trabaho.
* * *
Nipasidaan si Osmeña nga kon sigehan og atake si Marcos Jr. magpabilin nga taas ang iyang rating. Nipasalig siya nga kon hingusgan ang kampanya pagpahibawo sa katawhan sa tinuod nga mga panghitabo atol sa diktadura ni Marcos Sr., motibugsok ang kandidatura ni Marcos Jr.
Si Osmeña nibakwi sa iyang suporta ni Manila Mayor Isko Moreno human nisupak sa imbestigasyon sa International Criminal Court ni Presidente Duterte. Nagsuporta na siya karon ni Bise Presidente Leni Robredo. Giila siya nga maayong mohubad sa mga numero sa surveys ug manimon sa mga kampanya. Pero napilde sa iyang kaugalingong mga kampanya pagka senador niadtong 2016 ug 2019.
* * *
- Latest
