Dili magpaguba sa politika

Init na kaayo ang gubat sa politika. Nag-asoaso ang nagpadayon nga pagpangampanya sa nagkalainlaing partido ug iyaiyang mga dumadapig, kinsa gusto gyod nga sila ang modaug ning umaabot Mayo 9 nga piniliay.

Sa mainstream media (hinuon dili tanan), may mga eksena sama sa giipahigayong caravan matag partido ang wala imantala, ilabi na kon ang nauyonan nilang mga kandidato, kinsa maoy nangulo sa maong caravan, diyotay ray misalmot. Ug wala mahisama sa kaatbang nga napuno ang kadalanan sa mga mikuyog nga magdadapig.

Maayo gani kay anaa na ang social media, diin gipabaha sa magkaatbang nga vloggers halos ang matag kalihokan sama sa proclamation rally, kalye survey, presidential interviews, presidential debates ug uban pa, nga makatabang pagpresentar ug makahatag og ideya sa katawhan, kinsa ang maayo nilang botaran sa pagka-presidente ug pagka-bise presidente sa Pilipinas?

May vloggers, kinsa suod kaayong managhigala. Apan tungod sa politika, diin managlahing kandidato ang ilang gidapigan, ang usa ka basong bino nga kanhi saw-an nila pagtungab, sa kalit lang, nabuak ug napusgay.

Timaan, nga lisod nang mahibalik ang maanindot nilang relasiyon.

Sa Facebook, akong mga amigong ka-group chat, iyahay’g pagawas kinsang kandidatoha sa pagka-presidente ang ilang botaran. Ug tungod kay dili parehog kandidatong napili, nagpulipulig pahayag nganong kining kandidatoha ang dapat padag-on?

Matag usa, may pulidong rason. Hangtod nga sa tantong pagkinumbinsihay, napunta na hinuon sa mainit nga debate ug panaglalis ang maong isyu.

Apan bisan sa nagdilaab nang tinubagay sa mga ideya, ang pagkamahigalaon sa tagsatagsa namo ka kasingkasing nagpabiling intact ug wala molubad.

Niining bag-o, may presidentiable nga dihang gtunol iyang mga palad ngadto sa nagpunsisok nga supporters, nasamad og lawom ang duol nga bahin sa iyang pulso. Adunay mga dumadapig miingon: “Sinugo sa kaatbang nga kandidato ang mibuhat niini.”

Samtang ang mga kaatbang mibawos-pahayag usab: “Drama lamang kini aron makakuhag dugang siympatiya gikan sa katawhan ang maong presidentiable.”

Intawon, ayaw gub-a ang inyong kaugalingong pagkatawo ug ang pagkatawo sa uban tungod lang sa nag-alintabong kalayo sa politika! Hinumdomi. Kitang tanan managsuon sulod sa kasingkasing ni Kristo.

Magrespetohay ug maghigugmaay kita, sama sa Iyang paghigugma kanato. Kay niining paagiha, matagamtaman nato ang husay, patas ug malinis nga piniliay.